नेपालगन्ज, ३० भाद्र २०७७

विश्वका अधिकांश देशहरुमा गम्भिर कोरोना संक्रमित विरामीहरुमा प्लाज्मा थेरापी पद्धतीबाट उपचार गर्ने गरिन्छ । नेपालमा समेत केही महिनाअघि यो विधी प्रयोगमा ल्याइसकिएको अवस्था छ । गम्भिर खालका कोरोना संक्रमित विरामीहरु बढिरहेको अवस्थामा यसले केही भएपनि राहत दिएको छ । नेपालमा समेत यो विधीबाट उपचार गर्दा धेरै गम्भिर खालका कोरोना संक्रमितहरु निको भएर घर फर्किसकेका छन् । सबैलाई यसले केही भएपनि सकारात्मक आशा भने जगाइदिएको छ । कोरोनाको खोप तथा औषधी पत्ता नलागिसकेको अवस्थामा प्लाज्मा थेरापीले समेत धेरै जनाको ज्यान बचाउन सकिने देखिन्छ ।

बाँके जिल्लामा समेत प्लाज्मा थेरापीबाट गम्भिर संक्रमितको उपचार सुरु भइसकेको अवस्था छ । यहाँका दुई अस्पतालले प्लाज्मा थेरापीबाट उपचार गर्ने अनुमती सरकारबाट पाइसकेका छन् । अनुमती पाउनेमा सरकारीतर्फ भेरी अस्पताल र नीजितर्फ नेपालगञ्ज मेडिकल कलेज शिक्षण अस्पताल कोहलपुर रहेका छन् । पहिलोपटक भदौंको दोस्रो सातातिर भेरीमा उपचार गराइराखेका एक कोरोना संक्रमितलाई प्लाज्मा दिइएको थियो ।

उनी आइतबार कोरोना जितेर घर फर्किसकेका छन् । पहिलोपटक प्लाज्मा दिइएका संक्रमित निको भएर घर फर्किएपछि चिकित्सकहरु समेत उत्साहित छन् । बाँकेमा प्लाज्मा थेरापीबाट उपचार गर्दा निको हुने पहिलो व्यक्ति हुन्, शारदा नगरपालिका–६ सल्यान घर भई नेपालगञ्ज बस्दै आएका २९ वर्षीय प्रविण केसी । अन्य कुनै पनि रोग नभएका उनीमा कडा लक्षणसहितको कोरोना भाइरस देखिएको थियो ।

अवस्था गम्भिर बन्दै गएपछि चिकित्सकहरुले केसीलाई आइसीयुमा राखेर अक्सिजन दिदा समेत स्वास्थ्यमा सुधार आउन सकेको थिएन । कुनै पनि उपाय लगाउँदा संक्रमितको स्वास्थ्यमा सुधार नआएपछि चिकित्सकहरुले प्लाज्मा दिने निर्णय गरेका थिए । नभन्दै प्लाज्मा दिएपछि उनको स्वास्थ्य क्रमश सुधार हुँदै गएको थियो । उनलाई नेपालगञ्ज उप–महानगरपालिका वडा नम्बर १ का अध्यक्ष प्रमोद रिजालले प्लाज्मा दिएका थिए । संक्रमितलाई दिने प्लाज्मा कोरोना संक्रमित भएर निको भएका व्यक्तिको चाहिन्छ ।

गम्भिर अवस्थाका केसीलाई प्लाज्मा दिने काम मात्र भएन उनले कोरोनालाई पराजित गर्न सफल भए । बाँकेका दुई अस्पतालका आधा दर्जन गम्भिर संक्रमित विरामीलाई अहिले पनि प्लाज्मा दिएर उपचार गराइराखिएको छ । कोरोना संक्रमण भएर निको भएकाहरुमध्ये आधा दर्जन बढीले प्लाज्मा दान समेत गरिसकेका छन् । पहिलोपटकको प्रयास नै सफल भएपछि यहाँका चिकित्सक र स्वास्थ्यकर्मी खुसी भएका छन् ।

गम्भिर खालका संक्रमितका लागि यो उपचार विधी धेरै हदसम्म प्रभावकारी हुनसक्ने आंकलन छ । अब अरुको जिवन जोगाउनको लागि कोरोना भएर निको भएका व्यक्तिहरुले आफ्नो प्लाज्मा दान गर्नुपर्ने अहिलेको प्रमुख आवश्यकता देखिन्छ । नत्र यो उपचार विधी सम्भव नै छैन । त्यसैले प्लाज्मा दान गरेर गम्भिर खालका संक्रमित विरामीहरुमा निको हुने आशा दिलाउनुपर्छ ।