नेपालगञ्ज, ०८ पौष २०७७
अस्पताल तथा स्वास्थ्य केन्द्र र स्वास्थ्य चौकीहरुबाट प्रदान गरिने सेवाहरुको न्युनतम सेवा मापदण्ड देश भरि प्रभावकारी रुपमा कार्यान्वयन गरिने भएको छ ।
स्वास्थ्य सेवा बिभाग , उपचारात्मक सेवा महाशाखा टेकु काठमाडौंको आयोजनामा सुदूरपश्चिम प्रदेश , कर्णाली प्रदेश र लुम्बिनी प्रदेशका अस्पताल , स्वास्थ्य निर्देशनालय र सामाजिक बिकास मन्त्रालयका चिकित्सक, नर्सिंग तथा अन्य पारामेडीक्सका लागि लुम्बिनी प्रदेशको प्रमुख शहर नेपालगंजमा अभिमुखीकरण कार्यक्रम आयोजना गरिएको छ । सोहि कार्यक्रममा अस्पताल. प्राथमिक स्वास्थ्य केन्द्र र स्वास्थ्य चौकीहरुबाट प्रदान गरिने न्युनतम सेवा मापदण्डको बारेमा छलफल भएको र बिगत बर्षहरु देखि नै न्युनतम मापदण्ड सेवा कार्यक्रम संचालनमा रहेकोमा चालु आ. ब. मा यस लाइ प्रभावकारी रुपमा कार्यन्वयन गर्ने गरि कार्यक्रम तर्जुमा भएको कुरा स्वास्थ्य सेवा बिभाग , उपचारात्मक सेवा महाशाखा टेकु काठमाडौंका बरिष्ठ मे सु डा. पोमा थापाले जानकारी दिनु भएको छ ।
स्वास्थ्य संस्थाहरुले प्रदान गर्ने न्युनतम सेवा मापदण्डका सुशाशन तथा ब्यबस्थापन , उपचारात्मक सेवा ब्यबस्थापन र अस्पताल सहयोग सेवा गरि मुख्य तिन पक्ष रहेका छन् र अस्पताल तथा न्युनतम. मापदण्ड सेवा लागु भएका स्वास्थ्य संस्थाहरुले उपरोक्त तिन वटै पक्षमा रहेर समग्र अस्पतालको कार्यलाई केन्द्रित गर्नु पर्छ । न्युनतम सेवा मापदण्ड अनुसार कार्य गर्न सकिएमा अस्पतालको सुधार हुने , सेवा प्रभावकारी हुने र स्वास्थ्य सेवाका सूचकांक हरु माथि उकास्न सकिने कुरा कार्यक्रमका प्रमुख अतिथि तथा स्वास्थ्य तथा जनसंख्या मन्त्रालयका नीति , योजना तथा अनुगमन महाशाखा प्रमुख डा.गुण राज लोहनीले बताउनु भएको छ । साथै उहाँले स्वास्थ्य सेवामा सुधार ल्याउने प्रमुख माध्यमको रुपमा न्युनतम सेवा मापदण्डलाई लिनु पर्नेमा जोड दिनु भएको छ ।
न्युनतम सेवा मापदण्डको अभिमुखीकरण कार्यक्रम सुदूरपश्चिम प्रदेशका स्वास्थ्य निर्देशक डा. गुणराज अवस्थीको अध्यक्षतामा सम्पन्न भएको छ । अभिमुखीकरण कार्यक्रममा अध्यक्षको आशनबाट बोल्दै डा. अवस्थीले सुदूरपश्चिम प्रदेशका सबै अस्पतालहरुमा बिगत आ. ब. बाट नै न्युनतम मापदण्ड सेवा लागु भै सकेको र यस आ. ब. मा सुदूरपश्चिम प्रदेशका सबै स्वास्थ्य चौकी हरुमा न्युनतम मापदण्ड सेवा लागु गरिने गरि कार्यक्रम तय भएको कुरा बताउनु भएको छ । साथै उहाँले आगामी २०७७ चैत्र महिना भित्र सबै न्युनतम मापदण्ड सेवा लागु भएका स्वास्थ्य संस्थाहरुको अनुगमन गरिने र कार्यक्रमलाई प्रभावकारी रुपमा कार्यानवयन गर्न कुनै कसर बाकि नराख्ने कुरा बताउनु भएको छ ।
संघियता पश्चात स्वास्थ्यलाई तिन तहमा विभाजन गर्दा र समायोजनमा बिभिन्न तहमा कर्मचारी खटाउदा स्वास्थ्य सेवा लाइ अपांग बनाएको र समायोजन पश्चात प्रदेश र स्थानीय निकायमा खटिएका ८० प्रतिशत बढी स्वास्थ्यकर्मीको चित्त नबुझेको र स्वास्थ्य कार्यक्रमको महत्त्व नबुझ्ने व्यक्तिहरुको हातमा स्वास्थ्य सेवा को निर्णय गर्ने अधिकार पुगेकोले नेपाल सरकारले लिएको लक्ष्यहरु जस्तै रोग उन्मुलन गर्ने , रोग निवारण गर्ने , रोग नियन्त्रण गर्ने , मातृ मृत्युदर घटाउने , बाल मृत्युदर घटाउने , औशत आयु बढाउने , समग्र मृत्युदर घटाउने , बिरामी हुने दर घटाउने , तथा सकारात्मक स्वास्थ्य सूचकांक माथि बढ्नुपर्ने र नकारात्मक स्वास्थ्य सूचकांक तल झर्नु पर्ने कुरामा सहजता नहुने कुरा समेत सुदूरपश्चिम प्रदेश स्वास्थ्य निर्देशक डा. गुणराज अवस्थीले दोहर्याउनु भएको छ ।
अभिमुखीकरण कार्यक्रम निक साइमन्स इन्सीच्युटको आर्थिक तथा प्राबिधिक सहयोगमा र स्वास्थ्य सेवा बिभाग उपचारात्मक सेवा महाशाखा को आयोजनामा संचालन भएको र उक्त कार्यक्रम मा स्वास्थ्य तथा जनसंख्या मन्त्रालयका पूर्व प्रबक्ता तथा महाशाखा प्रमुख डा. बिकास् देवकोटाको पनि उपस्थिति रहेको थियो ।
Comments 3