नेपालमा औषधिको अभाव हुन नदिने औषधि उत्पादक संघको प्रतिबद्धता

काठमाडौं, २३ फागुन : नेपाल औषधि उत्पादक संघले कोरोना भाइरसको संत्रासका कारण नेपालमा औषधिको अभाव हुन नदिने प्रतिवद्दता व्यक्त गरेको छ । राजधानीमा पत्रकार सम्मेलन आयोजना गरि संघले औषधि कम्पनीहरुसंग ३ महिनाका लागि कच्चा पदार्थ मौज्याद रहेको र ३ महिना पुग्ने औषधि बजारमा रहेकाले कम्तिमा पनि ६ महिनासम्म औषधिको अभाव हुन नदिने व्यक्त गर्नुभयो। नेपाल औषधि उत्पादक संघका अध्यक्ष जी. नारायणबहादु क्षेत्रीले कोरोना भाइरसको नेपालमा बढ्दो संक्रमणका लागि उत्पादन हुने कुनै पनि औषधिको अभाव हुन नदिने बताए । क्षेत्रीका अनुसार २०७२मा गएको विनासकारी भूकम्प र भारतले गरेको नाकाबन्दीका बेला समेत हामीले औषधिको अभाव हुन दिएका थिएनौ। अहिले पनि कोरोना भाइरसका कारण असहज परिस्थिति आए पनि औषधिको अभाव हुने दिने छैनौ ।

बढीजसो औषधिको कच्चा पदार्थ भारत र चीनबाट आयात हुदै आइरहेको बताउदै त्यहाँबाट ल्याउन असहज भए बंगालादेश लगायतका अन्य देशबाट कच्चा पदार्थ आयात गरेर पनि औषधि उत्पादन गरेर अभाव हुन नदिने बताए । कोरोना भाइरसको संक्रमण भारतमा पनि देखिएपछि २६ प्रकारका कच्चा पदार्थमा रोक लगाएपछि भारत सरकारसंग वार्ता गर्न सरकारले उच्च स्तरीय संयत्र बनाएको जानकारी आएको तर यस बिषयमा औषधि उत्पादक संघलाई संलग्न नगराएको र सल्लाह नलिएकोमा अध्यक्ष क्षेत्रीको आपत्ति जनाए । यस्तै अवस्था आउने भएकाले औषधिमा देशलाई आत्मनिर्भर बनाउने संघको जायज मागलाई सरकारले आलटाल गर्दै आएको क्षेत्रीले गुनासो गरे । कोरोना भाइरसको त्रासका कारण औषधिको मूल्य नबढ्ने क्षेत्रीले बताए ।

पत्रकार सम्मेलनमा संघका पूर्व अध्यक्ष दीपक दाहालले बजारमा सिटामोलको कृतिम अभाव सिर्जना गर्न खोज्नु आपत्तिजनक भएको बताउदै एक महिना अगाडि मात्र ३८ मेट्रिक टन कच्चा पदार्थ आपूर्ति भएकाले कम्तिमा पनि ४ महिना सिटामोलको अभाव नहुने दावी गरे । संघका महासचिव विप्लप अधिकारीले सरकारले आपतका बेला विदेशी कम्पनीहरुसँग औषधिका लागि अनुनय बिनय गर्नु भन्दा स्वदेशी औषधि उद्योगलाई बढावा दिन सकेमात्र देशलाई औषधिमा आत्मनिर्भर बनाउन सकिने बताए । संघका अनुसार नेपालमा अहिले ६२ वटा औषधि कम्पनीले औषधि उत्पादन गरिरहेका छन् ।

अहिले नेपालमा खपत हुने औषधिको ४५ प्रतिसत हिस्सा नेपाली औषधिले ओगटेको छ । औषधि उत्पादकहरुका अनुसार सरकारले सहयोग गर्ने हो भने अहिलेको अवस्थामा ७५ प्रतिसत औषधि उत्पादन गर्ने क्षमता स्वदेशी औषधि कम्पनीहरुसँग छ ।

Next Post