काठमाडौं, २४ जेठ २०८०
नेपालको एकमात्र एलर्जी रोग विशेषज्ञहरुको छाता संगठन प्याप्सनको उत्कृष्ट पहिलो वर्ष पुरा गरेर दोस्रो वर्षमा प्रवेश गरेको छ।
प्याप्सनको बार्षिकोत्सको उपलक्ष्यमा कार्यक्रम गरी गएको एक वर्षमा गरिएको कार्यक्रम र भावी योजनाहरूको प्याप्सनका अध्यक्ष डा. महेश कुमार गौतम द्वारा प्रस्तुत गरिएको थियो।
कार्यक्रममा डा. गौतमले नेपालमा एलर्जी रोग जताततै व्याप्त भएपनि त्यसको सही पहिचान हुन नसक्दा बिरामीहरुले सही उपचार पाउन नसकिएको अवस्थाको बारेमा ध्यानकर्षण गराउनु भयो। खानाको एलर्जी, नाकको एलर्जी, श्वास प्रश्वासको एलर्जी जे भएपनि औषधि पसलबाट खादै रोग पाल्दै बस्ने नेपालीको संख्या धेरै रहेको उहाँले जानकारी गराउनुभयो।
एलर्जी कानका लागि इम्युनोथेरापि बाइलोजिकल जस्ता औषधिको सम्भावना हुदा पनि सही समयमा रोग र एलर्ज गर्ने तत्वको खोज नै नगर्ने बानीले रोग जटिल बन्दै जाने सम्भावना रहेको डा. गौतमले बताए। 
प्याप्सनका महासचिव डा. तेजसु सिंह मल्लले डा. महेशको नेतृत्वमा प्याप्सनले पहिलो वर्षमा धेरै जनचेतना बढाउने कार्यक्रमहरु गरेको जानकारी दिनुभयो।
त्यस्तैगरी प्याप्सनका नाक कान घाँटी रोग विशेषज्ञ डा. चन्दन बर्नवालले नाकको एलर्जी भएका बिरामीहरुलाई आस्थामा पनि हुने सम्भावना भएको र आस्थामा भएका झण्डै ८० प्रतिशत लाई नाकको एलर्जी हुने भएकाले नाकको एलर्जी समयमा सही उपचार हुनुपर्नेमा जोड दिनुभयो।
डा. चन्दनले इम्युनोथेरापिले नाकको एलर्जी रोक्ने मात्रै नभइ आस्थमाको बिकास पनि हुन बाट रोक्ने हुनाले त्यसको महत्व रहेको तर नेपालमा औषधि व्यवस्था विभागबाट स्वीकृति पाई नसकेको अवस्थामा बिरामीहरूको त्यो उपचार बाट अझै वञ्चित रहेको जानकारी दिनुभयो।
उनले भने, यस रोगको लागि उपचार खोज्दै भारत जानुपर्ने बाध्यता भएको बताउनुभयो।
प्याप्सनका छाला रोग विशेषज्ञ डा. एलिना कार्कीले छालामा हुने एलर्जी भएका मान्छेहरुमा शरीरको अन्य भागमा पनि एलर्जी हुन सक्ने कुरामा ध्यान दिनुपर्ने र त्यस्ता बिरामीलाई नाक कान घाँटी, छाती सम्बन्धि एलर्जी पनि हुने भएकोले सम्बन्धित सबै डाक्टरको निगरानीमा राख्नुपर्ने कुरामा जोड दिनुभयो।
कार्यक्रममा प्याप्सनका अन्य सदस्यहरु डा. सुजिता भण्डारी, डा. रेश्मा ढकाल लामिछाने, डा. जोन सिंह डंगोल र श्रीराम शाहले पनि आ-आफ्नो भनाई राख्नुभएको थियो।
कार्यक्रमको अन्तमा अध्यक्ष डा. गौतमले आउने दिनमा पनि औषधि व्यवस्था विभाग र सरकारका विभिन्न निकायहरु संग एलर्जीको सही पहिचान र उपचार बिधिको लागि एन्टिजेन, इम्युनोथेरापि र बायोलोजिकल औषधिहरू छिट्टै कानुनी रुपमा लाइसेन्स प्रमाणित गरि सजिलो उपलब्ध गराउन पर्नेमा जोड दिने बताउनु भयो। यससँगै एलर्जी रोग बढ्नुको कारणहरु, त्यसबाट बच्ने उपायहरु र सही उपचारको लागि जनचेतनामूलक कार्यक्रम गर्दै जाने पनि उहाँले बताए।
