काठमाडौं, ७ वैशाख २०७८
कोरोना संक्रमण सम्बन्धमा अन्तर्राष्ट्रिय रूपमा नै गहन अध्ययन गर्दै आइरहेका विज्ञ डा. रमेशकुमार आचार्यले नेपालमा यूके भेरियन्ट र ब्राजिलियन एपी वान इन्फेक्सन भाइरस भित्रिसकेकाले स्थिति अझै भयावह भएर जान सक्ने भन्दै सचेत र सतर्क रहन सबैलाई आग्रह गरेका छन् ।
‘नेपालमा ब्राजिल, यूके र इन्डियाको नयाँ भेरियन्ट भित्रिसकेको छ र समुदायमा फैलिसकेको छ त्यसैले आगामी दिन झनै झटिल र भयावह बन्न सक्ने देखिन्छ ।’ विज्ञ डा. आचार्यले भने ।
अहिले नेपालमा फैलिएको कोरोना संक्रमण र यसको असरबाट पीडित बनेकामा जटिल खालका लक्षण देखापर्न थालेका छन् । डा. आचार्यका अनुसार यूके भेरियन्ट र एपी वान इन्फेक्सनका समान लक्षण रहेका छन् । जसअनुसार अहिले कोरोना संक्रमण भएकामा अत्याधिक पेट दुख्ने, लगातार पखाला लाग्ने र जति औषधि खाए पनि पखाला नियन्त्रणमा नआउने, उच्च किसिमको सुुख्खा खोकीले सताउने, तीन दिनभित्रै फोक्सोमा निमोनिया देखिने, आँखा रातो हुने र मुख सुख्खा हुने, शरीर पुरै पोल्ने अत्यधिक, दुखाइ हुने, टाउको अत्यधिक दुख्ने, ब्लड प्रेसर र सुगरको मात्रा एक्कासि बढ्नेलगायतका लक्षण देखिने गरेका छन् । यसैगरी यूके भेरियन्टका कारण भएको संक्रमणमा नाकबाट तीव्र गतिमा पानी बग्ने, र एक्कासि तौल अत्यधिक घट्ने समस्या पनि देखिन थालेको डा. आचार्यले जानकारी दिए ।

विज्ञ डा. आचार्यले नेपालमा तत्काल सेमी लकडाउन गर्नुपर्ने आवश्यकता रहेको बताए। अहिले सेमी लकडाउन नगर्ने हो भने अबको १५ दिनमा स्थिति भयावह हुन्छ र पुरै देश लकडाउनमा नगई सुखै छैन,’ डा. आचार्यले भने, ‘त्यसैले सरकारले पनि नियन्त्रणका लागि प्रशस्त उपाय अपनाउनुपर्छ भने नागरिकले पनि सुरक्ष सर्तकता अपनाउन छोड्नुहँुदैन् ।’ डा. आचार्यका अनुसार हवार्ड अक्सफोर्डको नयाँ अध्ययनले अमेरिका र बेलायतमा १५ घण्टासम्म हावामा नै भाइरस रहेको पाइएको र वायुमण्डलमार्फत नै कोरोना संक्रमण फैलने गरेको पाइएको छ । नेपालमा पनि हावामार्फत भाइरस फैलन सक्ने सम्भावना बढेर गएकाले त्यस्तो स्थिति आउन नदिन विशेष सर्तकता अपनाउनुपर्ने डा. आचार्यको सुझाव छ ।
डा. आचार्यका अनुसार नेपालमा कोरोना संक्रमण अत्यधिक बढ्नुमा भारत र नेपालको खुला सीमामा कडाइ गर्न नसक्नु, विदेशबाट नागरिक नेपाल आएपछि बिनाक्वारेन्टिन घरमा जानु र आइसोलेसनमा नबस्नु, यसमा सरकारले लापार्बाही गर्नु, सार्वजनिक स्थानमा भिडभाड कायमै हुनु, अस्पतालमा सामान्य बिरामी पनि जानु तथा सरकारले आरटी पीसीआर परीक्षणको मात्रा बढाउन नसक्नुलगायत रहेका छन् ।
अहिले सेमी लकडाउन नगर्ने हो भने अबको १५ दिनमा स्थिति भयावह हुन्छ र पुरै देश लकडाउनमा नगई सुखै छैन ।

डा. आचार्यका अनुसार नेपालमा हाल शून्यदेखि नौ वर्षसम्मका बालबालिका, ६० वर्षमाथिका वृद्धवृद्धा तथा २५ देखि ४० वर्षसम्मका युवायुवतीमा बढी संक्रमण देखिएको छ । ‘सरकारको प्रसस्त गृहकार्यका अभाव र नागरिकस्तरमा यस्तै प्रकारको लापार्बाही देखिँदै गए आगामी १५ दिनमा स्थिति भयावह भएर जान्छ र हावामार्फत पनि भाइरस फैलन सक्ने अवस्था आउन सक्छ अनि देशव्यापी लकडाउन नगरी हुँदैन,’ डा. आचार्यले भने । डा. आचार्यले सरकारले प्रमुख सहरमा तत्काल ०.५ प्रतिशत सोडियम हाइपोक्लोराइड डिस्इन्फेक्टेड गर्नुपर्ने बताए ।
उनले सबै महानगरपालिका, नगरपालिका र गाउँपालिकाले आआफ्नो क्षेत्रमा डिस्इन्फेक्टेड गरेमा कोरोना संक्रमण बढ्न नपाउने स्पष्ट पारे ।