चितवन ,चैत २३
चितवनको भरतपुर-१० स्थित राष्ट्रिय पंक्षीरोग अन्वेषण प्रयोगशालामा आजबाट कोभिड १९ को नमूना परीक्षण प्रयोगशाला सञ्चालनमा आएको छ। प्रयोगशालाको सञ्चालनको सम्भाव्यता अध्ययनका क्रममा चितवन स्थित कृषि तथा वन विज्ञान विश्वविद्यालय र राष्ट्रिय पन्छी रोग अन्वेषण प्रयोगशालाहरुको विज्ञहरुबाट निरिक्षण पश्चात राष्ट्रिय पन्छी रोग अन्वेषण प्रयोगशालालाई कोभिड १९ को परिक्षणका लागि प्रयोग गर्न सकिने निष्कर्षमा पुगेका थिए । विज्ञ सहितको अन्य प्राविधिक टोलीले शुक्रवार र शनिवार साँझसम्म खटेर आजदेखि प्रयोगशाला सञ्चालनमा आउने भएको छ ।
बीपी कोईराला मेमोरियल क्यान्सर अस्पताल भरतपुरका मेडिकल अंकोलोजी विभागीय प्रमुख एवम् भरतपुर कोभिड १९ परीक्षण प्रयोगशाला स्थापना तथा सञ्चालन उपसमितिका संयोजक डा कृष्ण सागर शर्माले दिउँसो औपचारिक कार्यक्रमगरि आजदेखि प्रयोगशाला शुभारम्भ गर्न लागिएको बताए । नमुना परीक्षण सकेसम्म आजदेखि नै गर्ने योजना रहेको बताए । राष्ट्रिय जनस्वास्थ्य प्रयोगशाला टेकु काठमाडौंका सिनियर भाइरोलोजिस्ट विमलेश झाको नेतृत्वमा तीव्र रूपमा काम भएको उनले बताए ।
प्रयोगशाला सञ्चालनको लागि बीपी कोईराला मेमोरियल क्यान्सर अस्पताल भरतपुरका सिनियर मेडिकल ल्याब टेक्नोलोजिस्ट मदन पाण्डे र पुरानो मेडिकल कलेज भरतपुरका वायो टेक्नोलोजिस्ट डा ब्रजेस झालाई फोकल पर्सनका रुपमा जिम्मेवारी दिइएको डा।शर्माले जानकारी दिए । एक पटकमा ३ सयका दरले २४ घण्टा ९ १ दिन ० मा ९ सय नमुना परीक्षण गर्न सकिन्छ । प्रयोगशाला स्थापना तथा सञ्चालनको लागि विज्ञ सहितको ७ सदस्यीय टोलि गठनगरि काम भैरहेको छ ।
भरतपुर महानगरपालिका लगायतका जनताको चाहना पुरा गर्ने महानगर प्रमुख रेणु दाहालको दृढता, स्वास्थ्यमन्त्री एवं बिज्ञ टोलीको सक्रियता र सबै क्षेत्रको सहयोगको कारण भरतपुरमा कोरोना भाइरस परीक्षण ल्याब स्थापना गर्न सफल भएको संयोजक डा शर्माले जानकारी दिए । बिहीवार स्वास्थ्य मन्त्रालय सहितको स्थानीय सरोकारवाला टोलीले प्रयोगशाला कहाँ बनाउने भन्ने बारे निरीक्षण गरेको थियो । निरीक्षणपश्चात् राष्ट्रिय पंक्षीरोग अन्वेषण प्रयोगशाला भरतपुरलाई उपयुक्त भएको जनाएको थियो ।
भरतपुर महानगरपालिकाको पहलमा भरतपुर अस्पतालको स्वामित्वमा रहने गरी प्रयोगशाला सञ्चालनमा ल्याइएको बताइएको छ । यसअघि चितवनबाट कोरोनाका सम्भावित तथा शंकास्पद विरामीको नमुना संकलन गरी परिक्षणका लागि केन्द्रीय प्रयोगशाला काठमाडौँ र केही दिनयता हेटौडा पठाइदै आएको थियो । जसले गर्दा परीक्षणको रिपोर्ट आउन ढिलाई हुने गरेको थियो । अब चितवनबाट कोरोना परीक्षण सुरु भएसँगै त्यसले बिरामी पत्ता लगाउन सहज हुने छ । यदि पोजेटिभ आइहालेमा बिरामीले उपचार पनि समयमै पाउने छन् ।
पूर्वस्वास्थ्य मन्त्री समेत रहेका प्रतिनिधि सभा सदस्य गगन थापाले यस अघि नै प्रधानमन्त्रीलाई सम्भोधन गर्दै भेटेरिनरी तर्फका प्रयोगशालाहरुलाई समेत प्रयोग गर्न सुझाव दिएका थिए ।
यस अघि नेपाल भेटेरिनरी एशोसिएसनले अहिलेको संकटमा भेटेरिनरी सेवातर्फ रहेका प्रयोगशालाहरुलाई कोभिड १९ परिक्षणमा प्रयोग गर्न सकिने भन्दै गत साता नेपाल सरकारको ध्यानाकर्षण गराएको थियो ।
राष्ट्रिय पन्छी रोग अन्वेषण प्रयोगशालामा पन्छीका बर्ड फ्लू लगायत विभिन्न् रोगहरुको परिक्षण तथा अन्वेषण हुदै आएको थियो । स्मरण रहोस् पशु सेवा विभागका विभिन्न प्रयोगशाला र जनशक्ति यसअघि बर्ड फ्लू लगायत रोगको परिक्षण तथा अन्वेषण गरीरहेकाले यस संकटको घडीमा पशु सेवा विभागसंगको सहकार्य र समन्वयमा उक्त विभाग अन्तर्गत रहेका प्रयोगशाला र जनशक्तिको परिचालन गर्न सके कोभिड-१९ रोकथाम तथा नियन्त्रणमा कोशेढुङ्गा स्थापित हुन सक्ने विश्वास गरिन्छ ।
