सिन्धुपाल्चोक, १६ फागुन २०८१
चौतारा अस्पताल गुणस्तर सुधार न्यूनतम मापदण्ड कार्यान्वयनमा ९३ अंक प्राप्त गरी बागमती प्रदेशमै उत्कृष्ट अस्पताल बन्न सफल भएको छ
बागमती प्रदेश स्वास्थ्य मन्त्रालय स्वास्थ्य निर्देशनालयले चौतारा अस्पतालको अनुगमनपछि उक्त नम्बर दिँदै प्रदेश भरकै उत्कृष्ट अस्पताल घोषित गरेको हो। अस्पतालले माद्यमिक ‘ए’ लेबलको अस्पतालमध्ये न्यूनतम सेवा मापदण्ड कार्यान्वयन एमएसएसको सूचाङ्क अनुसार १०० प्रतिशतमा ९३ प्रतिशत ल्याउन सफल भएको थियो। निर्देशनालयका न्यूनतम सेवा मापदण्ड अनुगमनका प्रमुख वरिष्ठ मेडिकल सुपरिन्टेन्डेन्ट डा. नवीन दर्नाल सहितको समितिले अनुगमन गर्दा अस्पतालको सेवामा उल्लेख्य सुधार रहेको र सेवा प्रवाह मापदण्ड कार्यान्वयनमा उत्कृष्ट रहेको पाइएको हो।
अस्पतालले गर्ने नियमित काम उपचारलगायतको विषयमा अध्ययन अनुगमनका आधारमा चौतारा अस्पताल उत्कृष्ट घोषित भएको बागमती प्रदेश स्वास्थ्य निर्देशनालयका निर्देशक डा. नरेन्द्रकुमार झाले जानकारी दिनुभयो । सेवा प्रवाहलाई कमजोर हुन नदिन डा. झाले अनुरोध समेत गरे ।
अस्पतालको निमित बैठक बस्ने, दैनिक बिहानी छलफल, विद्युतिय हाजिर अनिवार्य, बिरामीको लागि टोकनको व्यवस्था, सूचनापाटीमा सूचना टाँस गर्ने गरेको, अस्पतालको आफ्नै वेबसाइट निर्माण गरी सञ्चालनमा ल्याएको, सुरक्षा गार्ड र सिसी टिभी क्यामेराको जडान लगायत अस्पतालको राम्रा पक्षहरु भएको निर्देशनालयले जनाएको छ।
अस्पतालका निमित्त मेडिकल सुपरिन्टेन्डेन्ट डा. रुद्रमणी भण्डारीले नियमित सेवामा जनरल ओपिडी सेवा, हाडजोर्नी, दन्त सेवा, सर्ने नसर्ने रोगको सेवा, प्रसूति सेवा लगायतका उपचार दिँदै आएको बताउनु भयो। डा. भण्डारीका अनुसार सुरुमा १५ शैयाको अस्पताल प्रादेशिक अस्पताल भएसँगै बागमती प्रदेश सरकार मन्त्रीपरिषद् तथा स्वास्थ्य मन्त्रालयको निर्णय अनुसार ५० शैयाको भएको थियो। अहिले सो अस्पतालले ६२ शैयाबाट सेवा दिँदै आएको छ। अस्पतालले केही समयअगाडिबाट डायलासिस सेवा पनि उपलब्ध गराउँदै आएको छ।
अस्पतालले क्षयरोगको औषधी वितरण, खोप लगाउने क्लिनिक, इमर्जेन्सी सेवा, फार्मेसी, सामाजिक सेवा एकाइ, स्वास्थ्य बिमा सेवा लिने स्थान, पालो कुर्ने स्थानलगायतका प्रबन्ध गरेको डा. भण्डारीले बताए। महिनामा करिब तीन हजार जना बिरामीले ओपिडी सेवा लिने गरेको तथ्याङ्क छ। विशेषज्ञ डाक्टरसहित ६३ जनाको दरबन्दी रहेको अस्पतालमा हाल १६ जना डाक्टर कार्यरत रहेका छन्।
