महेन्द्रनगर, १६ माघ २०७८
सुदूरपश्चिम प्रदेश, सामाजिक बिकास मन्त्रालय, स्वास्थ्य निर्देशनालय राजपुर डोटी तथा स्वास्थ्य कार्यालय कन्चनपुरको संयुक्त आयोजनामा “उपेक्षित रोगहरुको अन्त्य गरौ, स्वास्थ्य समता हासिल गरौ” भन्ने मूल नाराका साथ दिवस मनाउने काम सम्पन्न भएको छ ।
कंचनपुर, कैलाली र डडेल्धुराका २५ वटा पालिकाका स्वास्थ्य शाखा प्रमुख तथा प्रतिनिधि, स्वास्थ्य कार्यालय कंचनपुर, स्वास्थ्य निर्देशनालय दिपायल डोटीका कर्मचारी सहितको उपस्थितिमा उपेक्षित रोग अन्त्यको लागि बहस, पैरवी तथा वकालतको काम सम्पन्न भएको छ ।
बहस पैरवी तथा वकालत कार्यक्रमको प्रमुख अतिथि सुदूरपश्चिम प्रदेश सामाजिक विकास मन्त्रालयका माननीय मन्त्रि श्री लाल बहादुर खड्का रहनु भएको थियो भने कार्यक्रमको अध्यक्षता स्वास्थ्य निर्देशक डा. जगदीश जोशीले गर्नु भएको थियो ।
विश्व स्वास्थ्य संगठनले बिभिन्न २० वटा रोगहरुलाई उपेक्षित उष्ण प्रदेशीय रोग भनि बर्गिकरण गरेको छ । उक्त २० वटा रोग हरु मध्ये नेपालमा ११ वटा रोग हरु व्याप्त रहेका छन । गरिबीको रेखामुनी रहेका, उचित बसोबासको सुबिधा नभएका, पोषण तथा खानेकुराको अभाव भएका मानिस हरुलाई उपेक्षित रोग हरुले बढी संक्रमण गर्ने गर्दछ ।
कुष्ठरोग, कालाजार, हात्तीपाईले, डेंगी/चिकनगुनिया, रेबिज, सर्पको टोकाई, ट्रकोमा, जुकाको संक्रमण, टिनियासिस, सिस्टिसर्कोसिस, लुतो जस्ता रोगहरु नेपालमा पाइने उपेक्षित उष्ण प्रदेशीय रोग हरु हुन ।
नेपालमा पाइने यी मध्ये कुनै रोगहरु नियन्त्रणको लागि काम भइरहेको छ भने कुनै रोग हरु निवारणको लागि काम भै रहेको छ । कुष्ठरोग र ट्रकोमा रोग निवारण भईसकेको छन भने हात्तीपाईले, कालाजार निवारणको लागि काम भईरहेको छ ।
विश्व स्वास्थ्य संगठनको रणनीति अनुसार सन् २०३० सम्म उपेक्षित रोग हरु अन्त्य गर्ने रणनीति बमोजिम नेपालमा पनि रोग अन्त्यको रणनीति अगालेर काम भईरहेको स्वास्थ्य निर्देशनालयका बरिष्ठ जन स्वास्थ्य अधिकृत श्री ओम प्रकाश जोशीले बताउनु भएको छ ।
