काठमाडौं, २ असार २०८१
राजधानीको बसुन्धरास्थित ईशानबाल तथा महिला अस्पतालमा ११ वर्षकी बालिकाको जटिल र दुर्लभ शल्यक्रिया भएको छ ।
जन्मजात पिसावथैली र मुत्रप्रणालीमा समस्या रहेकी लिखु तामाकोसी ६ रामेछापकी ११ वर्षकी तृसना थापाको एकै पटक ४ किसिमका शल्यक्रिया गरिएको अस्पतालका निर्देशक प्रा.डा. रामनन्दन प्रसाद चौधरीले पत्रकार सम्मेलन गरि जानकारी दिनुभयो ।
डा. चौधरीका अनुसार सानो आन्द्राबाट पिसाबको थैली ठूलो बनाएको, दुईवटै मिर्गाैलाका नलीहरुमा पिसाब नफर्कने शल्यकिया, पिसाब थैलीको तल्लो प्वाल बन्द गरेको र ष्एपेन्डिक्सलाई प्रयोग गरी पिसाब निकाल्ने कृत्रिम नली बनाउने शल्यक्रिया गरिएको हो ।
२०८१ साल बैशाख १० गते प्रा.डा.चौधरी, प्रा.डा. श्याम कृष्ण महर्जनको टिमले १० घण्टा लगाएर अति जोखिम र अनौठो उक्त शल्यक्रिया गरिएको चौधरीले बताउनुभयो ।
प्रा.डा. चौधरीका अनुसार नेपालमा यस्तो किसिमको शल्यक्रिया सम्भवत पहिलो हो । यस्तो समस्या भएका अधिकांश बालबालिकाहरुको मृत्यु हुने गरेकोले पनि यसअघि यस्ता किसिमको रोगको उपचार नेपालमा नभएको हुनसक्ने उहाँले बताउनुभयो ।
तृसना थापाको ११ बर्ष अगाडि प्रसुति गृह थापाथलीमा जन्म भएको थियो । जन्मदा तृसनाको नाइटो भन्दा तल्लो भागमा पेटको भित्ता नभएको र पिसाबको थैली खुल्ला र पिसाब नली समेत नभई त्यहीबाट लगातार बाहिर पिसाब चुहिने अवस्था थियो । तृसना जन्मिएको ९ दिनमा प्राडा. आरपी चौधरीको नेतृत्वमा कान्ति बाल अस्पतालमा खुल्ला पिसाब थैली बन्द गर्ने शल्यक्रिया भएको थियो भने ४ बर्षको उमेरमा पिसाब नलि बनाउने शल्यक्रिया गरिएको थियो ।
पिसाबको थैलीको आकार उमेर अनुसार नबढी सानै भएको कारणले पिसाब लगातार चुहिरहने र पिसाब थैलोबाट पिसाब मिर्गाैलाबाट आउने दुईवटै नलीहरुबाट उल्टै फर्केर मिर्गाैलामा गईरहेको अवस्था थियो जसका कारण तृसनाले शल्यक्रिया अगाडि डाइपर लगाउनपर्ने अवस्था थियो ।
शल्यक्रिया पश्चात तृसनाले पाइप मार्फत पिसाव गर्न सकेको र हाल उहाँको दैनिक अवस्था सामान्य रहेको उहाँका बाबु सन्तोष थापाले जानकारी दिनुभयो ।
तृसनाको जस्तो यो स्वास्थ्य समस्या १० हजार जीवित जन्ममा १ जनामा देखिने गरेको प्राडा. चौधरीले बताए । यस्तो समस्या बालकलाई धेरै देखिने गरेको पाइन्छ ।
शिशु गर्भमै छँदा यो रोगको निदान हुन्छ तर उपचार भने जन्मिसकेपछि मात्रै गर्न सकिने डा. चौधरीले बताउनुभयो । एनामालिज परिक्षणबाट शिशुहरुमा विकलांगको समस्याको जोखिम रहे /नरहेको पत्ता लगाउन सकिन्छ।
