काठमाडौं, ८ चैत्र २०७९
स्वास्थ्य जीवनको लागि शिक्षा र पुनर्स्थापना भन्ने मूल उद्देश्यका साथ नेपाल क्यान्सर सरभाइवर सोसाइटीको आयोजना र निकोसिया विश्वविद्यालय साईप्रस, योगालाइफ, लाईन्स क्लव अफ पोखरा नर्सेज, अक्षरा बिधालय,साइक डेस्क फाउन्डेसनको सहकार्यमा आईतवार उल्लेखित स्वास्थ्य कार्यक्रम सम्पन्न गरियो।
काठमाडौंमा स्तन क्यान्सर विजेतालाई लक्षित गरी आयोजित सो कार्यक्रममा २८ जना क्यान्सर बिजेता सहित जम्मा ५० जनाको सहभागिता रहेको थियो। उल्लेखित तालिममा योगा र ध्यान सँग सम्बन्धित प्रशिक्षण श्री यात्रा शर्माले गराउनुभएको थियो। त्यसैगरी घरमा बसेर आफूले गर्न सकिने फिजियोथेरापी सम्बन्धि अभ्यास श्री गौतम केसीले दिनुभएको थियो। क्यान्सर भएका बिरामीले आफ्नो जीवन शैली परिवर्तन एवं पोषण आहार सम्बन्धि ज्ञान, छलफल र अन्तर्क्रिया पोषण विज्ञ श्री बसन्ती थापाले गर्नुभएको थियो भने निकोसिया विश्वविद्यालयमा नर्सिङमा विद्यावारिधि गरिरहनु भएको श्री रोजना ढकालले आफ्नो सोधकार्यको मुख्य निष्कर्षहरु, क्यान्सर बिरामीमा देखिने यौन र मानसिक समस्या तथा त्यसको समाधान सम्बन्धी विषयमा कार्यपत्र प्रस्तुत एवं छलफल गर्नुभएको थियो।
क्यान्सर रोग विशेषज्ञ डा. अरुण शाहीले महिलामा देखिने पाठेघरको मुखको क्यान्सर र स्तनको क्यान्सरको परिचय सहित त्यसको पहिचान, रोकथाम, उपचारको साथै क्यान्सर पछि सरभाइवरहरुले ध्यान दिनुपर्ने कुरा र कृत्रिम अंग स्तन प्रत्यारोपण एबम त्यसको स्याहार सम्बन्धी कुराको जानकारी एवं अन्तरक्रिया गर्नुभएको थियो।
पोखरा विश्वविद्यालयका उप-प्राध्यापक पदमा कार्यरत ढकालको विद्यावारिधि सम्बन्धि अनुसन्धान कार्यको उद्देश्य र आयोजित कार्यक्रमको उद्देश्य समान भएकोले सामुहिकरुपमा यो कार्यक्रमको आयोजना गरिएको नेपाल क्यान्सर सरभाइवर सोसाइटीकी अध्यक्ष श्री प्रमिता खनालले प्रष्ट पार्नु भएको थियो भने उक्त संस्थासँग शोधकर्ता श्री रोजना ढकालले बिगत समयदेखि नै सहकार्य गर्दै आएको समेत उहाँले जानकारी गराउनुभयो। उक्त कार्यक्रमको सञ्चालन क्यान्सर बिजेता श्री प्रमिला केसीले गर्नुभएको थियो। यस्ता कार्यक्रमहरुले क्यान्सर बिजेताहरुको शारीरिक एवम् मानसिक तन्दुरुस्ततामा थप उर्जा दिने बिश्वास सहभागीहरुले गरेका छन।
