✍️ लक्ष्मण कार्की,
योग प्रशिक्षक तथा मनोविमर्श कर्ता
नेपालगञ्ज
योग भनेको जोड्नु हो, यो भगवान सँग मान्छे जोड्नु, तन सँग मन जोड्नु हो, आत्मा सँग परमात्मा जोड्नु। योग कर्ममा कुशलता र कला शैली सिकाउने विद्या हो। योगले कर्म बन्धन को बन्धकबाट मुक्त हुन सिकाउँछ। कर्मयोग ज्ञानयोग भक्तियोग को माध्यम बाट जीवनलाई शुद्धता तिर लैजान्छ।
प्रत्येक व्यक्तिमा योगमय रहने क्षमता हुन्छ तर मान्छेहरू ज्ञान, सिप र क्षमताको कारणले पछाडि परेका छन्। योग द्वारा नै संसारमा रहेका जीवन र जगतका सम्पुर्ण समस्या एवं चुनौतीहरु समाधान गरी दुखः बाट विजयी हुन सकिन्छ। यसले स्वस्थ र उच्च जीवनशैली बाच्न सिकाउँछ; जस्तो कि सकारात्मक सोच हुन सिकाउँछ, रोग, शोक, चिन्ता, दरिद्रता, तनाव, आत्महिनता जस्ता चिजहरु बाट बाहिर निस्कन सिकाउँछ। जब ब्यक्ति यस्तो दुर्बलता रबाट मुक्त हुन्छ तब मनमा समभाव उत्पन्न हुन्छ अनि परिवार, समाज, राष्ट्रमा समृद्धि र दिगो विकास सम्भव हुन्छ। योगकै सहायताले मान्छे जति माथि पनि जान सक्छ। जति योगको नियम पालना गर्न सकियो त्यति शुन्दर जीवन जिउन सकिन्छ।
आधुनिकताको नाममा ब्यस्त जीवन जिउनेहरुका लागि विहानको एक घन्टा योगको लागि निकाल्न मात्र सकियो भने पनि दिनभरीको कार्य क्षमतामा बिकास आई स्वास्थ्यमा कुनै बिकार हुन बाट बच्न सकिन्छ।
विशद्द योग कुनै धर्म सम्प्रदाय जाति भाषाको लागी नभएर समस्त मानवजातिको लागि विज्ञान सम्मत जीवनशैली हो। आधुनिकताले भरिएको समाजमा घरमा समाजमा देशमा समस्या, चुनौती, द्वन्द्व, तनाव दिनप्रतिदिन बढिरहेको छ यसबाट बाहिर आउन पनि स्थिर चित्त द्वारा निर्णय शक्ति, कार्य क्षमता, कार्य दछ्याता बढाउनु आवश्यक छ।
अतः योगले नै चित्त स्थिर ल्याई क्षमता बढाइदिन्छ र स्थिर चित्तले प्रत्येक परिवारमा शान्ति शौहार्द र सद्भाव बढाइदिन्छ। विश्वका कुनै पनि चिकित्सा जगतले आजसम्म उपचार गर्न नसकेको काम क्रोध मोह ईर्ष्या घृणा द्वेषको समाधान ध्यान प्राणायामको अभ्यासले गर्न सकिन्छ। आजभोलि हाम्रो जीवनशैली खानपान अन्धाधुन्ध छ, अनियमित छ खाने, पिउने, सुत्ने, उठ्ने तरिका नै थाहा छैन, पैसा को पछि सारा संसार लागेको छ तर त्यहि पैसा चालिस कटे पछि जिवनभर कमाएको सबै खर्चेर पनि उपचार गर्न नसकि ज्यान गइरहेको छ। समयमै जीवनशैली, सदाचार, शान्ति एवं स्वस्थ संवेदनशील जिवन जिउने बानीको विकास भयो भने स्वत: रोग, अशान्ति, भ्रष्टाचार पनि दूर हुने थियो।
योगमा सरकारले पनि रोग लागेर निको पार्न गरिने चिकित्सा उपचारमा गर्ने लगानीको २०% मात्र पनि लगानी गरेर स्वास्थ्य सम्बन्धी जनचेतना जगाउने काम गर्न सकियो भने पनि आधा रोगी निको हुने थिए। यसप्रति समयमा नै सबैको ध्यान जाओस्। जय होस।
[हाल : कार्की सह -निर्देशक, एसओएस बालग्राम नेपालगञ्जमा कार्यरत छन् ।]
