काठमाडौं, १२ पुष २०७७
हृदयेसी त्रिपाठीले आइतबार स्वास्थ्यमन्त्रीको पदबहाली ग्रहण गर्दै स्वास्थ्य क्षेत्रमा क्रान्तिलाई छिट्टै रोकेर द्रुत रुपमा अगाडि बढाउने बताए ।
नवनियुक्त स्वास्थ्य तथा जनसंख्या मन्त्री हृदयेश त्रिपाठीले आगामी बर्ष थप २६२ वटा आधारभूत अस्पताल निर्माण सुरु गर्ने नीतिगत निर्णय गरेका छन् । स्वास्थ्य मन्त्रालयमा पदभार ग्रहण गर्दै मन्त्री त्रिपाठीले आगामी वर्ष २६२ वटा स्थानीय तहमा ५, १० र १५ शय्याका आधारभूत अस्पतालहरु निर्माण गर्ने निर्णय गरेका हुन्।
सबै स्थानीय तहमा कम्तीमा एउटा अस्पताल पुर्याउने लक्ष्यका साथ सरकारले यसबर्ष ३९६ वटा स्थानीय तहमा अस्पताल निर्माणको कार्य थालनी गरिसकेको छ । आगामी बर्ष बाँकी रहेका सबै अर्थात २६२ वटा स्थानीय तहमा अस्पताल निर्माण शुभारम्भ गर्ने योजना मन्त्रालयको छ ।
सरकारको योजना. देशका सबै स्थानीय तहमा कम्तिमा आधारभूत तहका अस्पताल हुनुपर्छ । सोही अनुसार यो बर्ष ३९६ वटा अस्पताल निर्माणको प्रक्रिया अघि बढ्यो । आजको निर्णय बाँकी रहेका २६२ वटा स्थानीय तहमा आगामी बर्ष निर्माण शुरु गर्नका लागि नीतिगत निर्णय गरिएको हो । मन्त्रालयका नीति योजना महाशाखाका उपसचिव तारा लुईटेलले बताए ।
लुइटेलका अनुसार आजको निर्णयमा स्थानीय तहले यसैबर्ष जग्गा, स्थान र डीपीआर तयार गर्ने उल्लेख छ । डीपीआरका लागि मन्त्रालयले ५ बेडका लागि १ लाख, १० बेडका लागि १ लाख ५० हजार र १५ बेडका लागि २ लाख रुपैयाँ अनुदान पठाउने छ । रकम नपुग भए स्थानीय तहले नै व्यवस्था गर्ने भनिएको छ ।
मन्त्री त्रिपाठीले देशभरका स्थानीय तहमा दुई तीन बर्ष भित्रमा अस्पताल सञ्चालनमा ल्याउने सरकारको निर्णय स्वास्थ्य क्षेत्रका लागि क्रान्ति भएको टिप्पणी गरे । उनले यस्तो निर्णय दक्षिण एसियाली मुलुकमा केहि पनि नभएको ठोकुवा गरे ।
