काठमाडौं, ०५ चैत २०७८
विश्व मुख स्वास्थ्य दिवसको पूर्वसन्ध्यामा नेपाल डेन्टल एसोसिएसनले फुटसल प्रतियोगिता सम्पन्न गरेको छ।
वर्ल्ड डेन्टल फेडेरेसनको संयोजकत्वमा विश्व भरिका १४० भन्दा बढी देशहरूमा हरेक वर्ष मार्च २० मा मनाइने विश्व मुख स्वास्थ्य दिवसको अवसरमा नेपालमा दन्त चिकित्सक हरुको छाता संगठन नेपाल डेन्टल एसोसिएसनले हरेक वर्ष विश्व मुख स्वास्थ्य दिवस मनाउँदै आइरहेको छ। यसै सन्दर्भमा विश्व मुख स्वास्थ्य दिवसलाई लक्षित गरी देशव्यापी कार्यक्रमहरूको तयारी गरिरहेको नेपाल डेन्टल एसोसिएसनले शनिबार दन्त चिकित्साका विद्यार्थी, चिकित्सक तथा प्राचार्यहरुको समेत सहभागितामा काठमाडौंमा फुटसल प्रतियोगिता गरेको हो।
वसुन्धरा फुटसल ग्राउण्डमा दन्त चिकित्सकहरुको एक आपसमा सहकारिता, सद्भाव, समन्वय, सहकार्य र सह अस्तित्व कायम गर्न फुटसल प्रतियोगिताको आयोजना गरिएको हो ।
प्रतियोगितामा पुरुष तर्फ १२ र महिला तर्फ ४ वटा टिमको सहभागिता रहेको नेपाल डेन्टल एसोसिएसनका महासचिव एवं मुख स्वास्थ्य दिवस आयोजना कमिटीका अध्यक्ष डा. गालव अधिकारीले बताए।
डा. अधिकारीका अनुसार महिला तर्फको बिजेता काठमाडौं मेडिकल कलेजको टोली थियो भने उपबिजेता टिम काठमाडौं युनिभर्सिटी स्कूल अफ मेडिकल साइन्स भएको थियो।
त्यस्तैगरी काठमाडौं बाहिरबाट सहभागिता जनाएको एक मात्र टोली चितवन मेडिकल कलेजको टिमले पुरुष तर्फको फुटसल रनिङ शिल्ड आफ्नो कब्जामा पार्न सफल भएको थियो भने उपविजेता टोली कान्तिपुर डेन्टल कलेज बसुन्धरा रहेको थियो।
प्रतियोगिताको उत्कृष्ट खेलाडी पुरुष तर्फ चितवन मेडिकल कलेजका क्षितिज प्रसाईं र महिला तर्फ काठमाडौँ मेडिकल कलेज की युकी खड्कालाई घोषित गरिएको थियो।
सहभागिता जनाएका सबै खेलाडीहरूलाई प्रमाणपत्र, तथा विजेता र उपविजेतालाई प्रमाणपत्र, पदक तथा नगद पुरस्कार बितरण गरिएको थियो।
यसै गरी विश्व मुख स्वास्थ्य दिवसको अवसरमा नेपालका १२ ओटा शाखा कार्यालयले विभिन्न कार्यक्रमहरु मनाउने निर्णय गरेको जानकारी एसोसिएसनका अध्यक्ष डा. सुभित मास्केले दिनुभएको छ।
केन्द्रीय कमिटीले देशभरिको सहभागितामा मुख स्वास्थ्य दिवसको अवसरमा विगत एक हप्तादेखि सामाजिक सञ्जालमा १० ओटा विशेषज्ञ टोलीको जनचेतनामुलक भिडियो प्रतिस्पर्धा समेत संचालन गरिरहेको छ। जसमा तीन वटा विजेता टोलीलाई पुरस्कार बितरण हुने भएको डा. मास्केले बताए।
विश्व मुख स्वास्थ्य दिवसको अवसरमा आम सर्वसाधारणको जनचेतना जगाउनको निमित्त कलाकार, सामाजिक हस्ती तथा प्रतिष्ठित डाक्टरहरुको जनचेतनामुलक संदेश समेत सामाजिक सञ्जालमा प्रेषण गरिने जानकारी डा. अधिकारीले दिनुभयो ।
नेपाल डेन्टल एसोसिएसनले भोलि विश्व मुख स्वास्थ्य दिवसको दिन आफ्नो आधिकारिक फेसबुक पेजबाट देशभर यी भिडियो हरु प्रसारण गर्दै छ जसको मूल उद्देश्य आम सर्वसाधाणलाई आफ्नो मुखको स्वास्थ्य प्रति सजग गराउनु हो। दिवसको दिन काठमाडौं उपत्यकामा र उपत्यका बाहिर थुप्रै कार्यक्रम हुने भएको छ।
एसोसिएसनका १२ वटा शाखाहरुले देशका विभिन्न ठाउँमा जनचेतनाको लागि र्याली, तीन वटा विद्यालयमा स्कूल डेन्टल हेल्थ जनचेतनामुलक कार्यक्रम, फोटो प्रदर्शनी, गोष्ठी लगायत कार्यक्रम सञ्चालन गरिरहेका छन्।
दिवसमा नेपालका विभिन्न डेन्टल कलेज, अस्पताल तथा क्लिनिकहरुमा निशुल्क परामर्श तथा उपचार सेवामा छुटको समेत व्यवस्था गरिएको डा. अधिकारीले बताए।
