काठमाडौं, १७ भाद्र २०७९
डेंगु संक्रमण ७२ जिल्लामा फैलिएको छ । एपिडिमियोलोजी तथा रोग नियन्त्रण महाशाखाका अनुसार काठमाडौं उपत्यकामा असारको दोस्रो सातादेखि देखिन थालेको डेंगु संक्रमण भदौको तेस्रो साता नपुग्दै लगभग देशभरि फैलिएको हो । देशभर हालसम्म तीन हजार तीन सयभन्दा बढीमा डेंगु संक्रमण पुष्टि भइसकेको छ ।
डेंगु संक्रमणबाट धनगढीमा एकजनाको मृत्यु भएको छ । धनगढीमा रहेको निसर्ग अस्पतालमा उपचाररत एक महिलाको डेंगुका कारण मृत्यु भएको जिल्ला स्वास्थ्य कार्यालय कैलालीले जनाएको छ । धनगढी उपमहानगरपालिका – ३५ की वर्षीया गीता शाहीको उपचारका क्रममा मंगलबार मृत्यु भएको थियो । मृत्युअगाडि लिइएका नमुनामा परीक्षण गर्दा डेंगु पुष्टि भएको जिल्ला स्वास्थ्य कार्यालयले जनाएको छ ।
तर, शाहीमा निमोनियासमेत रहेकाले संक्रमणबारे अस्पतालसँग थप समन्वय गरिरहेको एपिडिमियोलोजी तथा रोग नियन्त्रण महाशाखाले जनाएको छ । महाशाखाका कीटजन्य रोग शाखा प्रमुख डा. गोकर्ण दाहालका अनुसार अस्पतालबाट मृत्युको विवरण आए पनि थप मेडिकल प्रमाणसहित पुष्टि गर्न अस्पताललाई निर्देशन दिइएको हो ।
हाल ललितपुर, काठमाडौं र रुपन्देहीमा ह्वात्तै संक्रमण बढेको महाशाखाले जनाएको छ । त्यसपछि संखुवासभा, अर्घाखाँची, तेह्रथुम, धादिङ, सिन्धुली, गुल्मीलगायतका जिल्लामा डेंगु संक्रमण फैलिएको छ । योसँगै उपत्यकाका अस्पतालहरूमा ज्वरोसहितका लक्षण भएका बिरामीको भिडभाड बढेको छ । संक्रामक रोगको उपचार हुने टेकु अस्पतालको इमर्जेन्सीमा बिहीबार डेढ सयभन्दा बढी बिरामी उपचारका लागि पुगेका थिए ।
हाल टेकु अस्पतालमा डेंगुका २४ जना बिरामी भर्ना भएकामा चारजनाको आइसियूमा उपचार भइरहेको अस्पतालले जनाएको छ ।
