डडेल्धुरा, २१ माघ २०८१
डडेल्धुरा मेडिकल कलेजमा आइतबारदेखि थप दुई संकायको पढाइ सुरु भएको छ । सुदूरपश्चिम विश्वविद्यालय मातहत रहेको मेडिकल कलेजमा वीपीएच (ब्याचलर इन पब्लिक हेल्थ) र वीएस्सी नर्सिङ सञ्चालनको अनुमति पाएपछि मेडिकल कलेजले यी दुई बिषय पठनपाठन सुरु गरेको हो ।
यसअघि गत वर्षदेखि कलेजले बिएस्सी एमएलटी (ब्याचलर्स इन मेडिकल ल्याब टेक्नोलोजी) को पठनपाठन शुरु गरेको थियो । मेडिकल कलेजका डिन डा. हेमनाथ जोशीका अनुसार कलेजले वीपीएचमा १० र वीएस्सी नर्सिङ मा २० जनाको कोटा पाएको थियो । तर अहिलेसम्म वीपीएचमा ५ र वीएस्सी नर्सिङमा १८ जना विद्यार्थी भर्ना भएका छन ।
१० जनाको कोटा रहेको बिएस्सी एमएलटीमा ६ जना भर्ना भएको उनले बताए । गत वर्ष भने ८ जना भर्ना भएका थिए । मेडिकल कलेजका सह प्रध्यापक धर्मराज भट्टले दुई वर्षको अवधिमा तीनवटा कार्यक्रम पाउनु डडेल्धुरा मेडिकल कलेजका लागि खुसीको क्षण भएको बताए ।
डडेल्धुरा अस्पताल विकास समिति अध्यक्ष करुणाकर ओझाले सबैको सामूहिक पहलमा मेडिकल कलेजले सफलता पाएको बताए । ओझाका अनुसार ‘विद्यार्थीलाई गर्नुपर्ने सहयोगका लागि अस्पताल सधैं तयार छ । उनले भने, अस्पतालको अझै स्तरोन्नति गर्दै छौं । तीनसय बेडको अस्पताल बन्यो भने एमबीबीएस पढाइ हुने मेडिकल कलेज पाउने छौं ।’
कार्यक्रममा नयाँ विद्यार्थीलाई स्वागत पनि गरिएको छ । सरकारले डडेल्धुरा अस्पताललाई २०७८ माघ १० गते मेडिकल कलेजका रुपमा विस्तार गर्ने निर्णय गरेको थियो । एमबीबीएसको पढाइ सुरु गर्न भने डडेल्धुरा अस्पताल कम्तीमा पनि तीन सय शैया स्तरोन्नति हुन आवश्यक छ । अहिले अस्पताल एक सय शय्यामा संचालन हुदै आएको छ।
