डडेल्धुरा, १२ बैशाख
सुदूरपश्चिम प्रदेशको केन्द्र भाग डडेल्धुरास्थित संघीय सरकारअन्तरगतको सुदूरपश्चिम प्रदेशकै एक मात्र विशेषज्ञ अस्पतालका रुपमा रहेको डडेल्धुरा अस्पतालमा पानी चुहिने समस्या भएपछि बिरामीहरुलाई समस्या भएको छ। बिहीबार बेलुकीपख परेको पानीले अस्पतालको छाना चुहिएपछि अस्पतालमा बेड भर्ना रहेका बिरामीलाई समस्या भएको हो।
बिरामी रहेको वार्डको बेडमा बाहिर जत्तीकै पानी चुहिएपछि वार्डमा रहेका बिरामीलाई निकै समस्या भएको प्रत्यक्षदर्शीले बैतडी पाटनका धर्मराज भट्टले बताए।
विशेषज्ञ अस्पतालका रुपमा रहेको डडेल्धुरा अस्पतालमा अहिले यहाँका ७ वटै पहाडी जिल्लाबाट बिरामीहरु आउने गर्दछन्। वार्ड भित्रै पुरै चुहिने समस्याका कारण करीब ६ वेडमा रहेका बिरामीलाई अन्यत्र सारेर उद्धार गरिएको छ।
असपताल भित्रै पानी जमेपछि वार्डमा रहेका सबै बिरामी समस्यामा परेको बिरामीका कुरुवा महेन्द्र धनाडीले बताए। ‘हामीले पानी छल्दै बेडमा बस्नु परिरहेको छ।’ धनाडीले भने।
लकडाउनको समयमा समेत निकै बढी बिरामीको उपचार गर्ने डडेल्धुरा विशेषज्ञ अस्पतालको यो अवस्थाले बिरामीलाई मात्र होइन चिकित्सकलाई समेत हैरान पारेको छ।
नयाँ भवनको पानीसमेत पुरानो भवनको छानामा पर्ने र बाहिर निकास नभएपछि पानी भित्र पस्ने समस्या रहेको अस्पतालले जनाएको छ।
भौतिक संरचनाको अभावमा एचडिसिएस नामक गैर सरकारी संस्थाले अस्पताल स्थापनाका बेला निर्माण गरेको पुरानो जीर्ण भवनबाट सेवा संचालन गर्नुपरिरहेको र जीर्ण हुँदा समस्या आएको अस्पतालका निमित्त मेडिकल सुपरिटेन्डेन्ट डा.जगदीशचन्द्र विष्टले जानकारी दिए।
‘यहाँ केही समयदेखि पानी चुहिने समस्या छ। नयाँ भवनको पानी पनि यहीँ पुरानो भवनमा झर्छ।’ उनले भने, ‘प्राविधिकहरू बोलाएर पनि समस्या सामाधान गर्न खोजेका हौं। तर नयाँ भवन निर्माण गर्दा ध्यान नपुगेकाले यो समस्या आएको हो।’
पानी रोख्नको लागि विभिन्न प्रयासहरू गरेपछि धेरै पानी जम्मा हुने भएकाले समस्या सामाधान हुन नसकेको उनको भनाइ छ। पानी चुहिने समस्या सामाधानका लागि फेरि प्राविधिक बोलाएर मर्मत गरिने जानकारी दिए। नयाँ भवन निर्माणका क्रममा रहेकाले भवन निर्माण भए यो समास्या पूर्णरुपमै सामाधान हुने उनले बताए।
संघीय सरकारले सुदूरपश्चिमको केन्द्र भागमा रहेको डडेल्धुरा अस्पतालमालाई विशेषज्ञ अस्पतालका रुपमा विकास गर्दै जाँदा भौतिक संरचनाको अभावका कारण वर्षादको समयमा अस्पतालमा झनै समस्या हुने गरेको छ।
