भक्तपुर, २९ असोज २०८२
भक्तपुर क्यान्सर अस्पतालले विश्व होस्पिस तथा प्यालियटिभ केयर दिवस–२०२५ को अवसरमा विशेष कार्यक्रम आयोजना गरेको छ ।
बुधबार भएको कार्यक्रममा अस्पतालले देशभर प्यालियटिभ सेवाको सशक्त विस्तार गर्ने प्रतिबद्धता व्यक्त गर्दै ‘बीसीएच प्यालियटिभ केयर कोष’ स्थापना गर्ने घोषणा गरेको छ । यो कोषबाट आर्थिक रूपमा कमजोर भएका बिरामीहरूलाई निःशुल्क सेवा प्रदान गरिनेछ ।
कार्यक्रमका अध्यक्ष तथा अस्पतालका कार्यकारी निर्देशक डा. उज्ज्वल चालिसेले जीवनको अन्तिम चरणमा पनि प्रत्येक व्यक्तिले माया, सहानुभूति र सम्मान पाउने अधिकार रहेको बताउनु भयो । हामी केवल उपचार मात्र होइन, मानवताको सेवा गरिरहेका छौं र प्यालियटिभ केयर हाम्रो सामाजिक र नैतिक दायित्व रहेको उनले बताए । नेपालमा पहिलोपटक होस्पिस सुविधा स्थापना गर्ने लक्ष्य रहेको बताउँदै सरकारी, गैरसरकारी निकाय र समुदायबीच सहकार्य आवश्यक रहेको बताए।
अस्पतालले हाल देशकै एक प्रमुख प्यालियटिभ केयर इकाई सञ्चालन गरिरहेको छ, जसलाई थप सुदृढ बनाउने योजना छ । यसबाहेक, अस्पतालमा सर्जरी, विकिरण उपचार, कीमोथेरापी, इम्युनोथेरापी, प्रयोगशाला सेवा, सिटी स्क्यान जस्ता सुविधाहरू उपलब्ध छन् । यसै वर्षदेखि पिट स्क्यान सेवा पनि सुरु हुने डा. चालिसेले जानकारी दिनुभयो। 
प्रमुख अतिथि मिस नेपाल २०२५ सुश्री लुना लुइटेलले आफ्हो मन्तव्य राक्दै प्यालियटिभ केयर केवल चिकित्सकीय सेवा होइन, यो मानवीय मूल्यसँग जोडिएको अभियान हो र हामी सबैले यसलाई सामाजिक दायित्व ठान्नुपर्छ ।
कार्यक्रमका विशिष्ट अतिथि स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीले नेपाल सरकारले २०२५–२०३५ को राष्ट्रिय प्यालियटिभ केयर रणनीति स्वीकृत गरेको बताए । यो रणनीतिले सेवाको विस्तारमा महत्वपूर्ण भूमिका खेल्नेछ ।
डा. चालिसेले रणनीतिको पाँच मुख्य पक्षहरू – मानव संसाधन विकास, सेवाको पहुँच विस्तार, संस्थागत सुदृढीकरण, औषधि सुनिश्चितता र समुदाय संलग्नता बारे प्रष्ट पार्दै प्यालियटिभ सेवालाई राष्ट्रिय प्राथमिकतामा राख्न आग्रह गरे । नेपालमा हाल यस्तो सेवामा विशेष एमडी डिग्री प्राप्त दुई चिकित्सक मात्र छन्, जसमध्ये दुवै भक्तपुर क्यान्सर अस्पतालमै कार्यरत छन् । अस्पतालले घरमा आधारित केयर र टर्मिनल केयर इकाईमार्फत निरन्तर सेवा दिइरहेको छ ।
कार्यक्रममा लायन्स क्लब अफ बाग्मती क्यान्सर केयर (१ लाख), डीके मेडी सेल्स (५ लाख बराबर), पूर्व–पश्चिम चिन्ता (२ लाख) र श्रीमती उषा दीक्षित (१ लाख) बाट कोषमा सहयोगको प्रतिबद्धता प्राप्त भएको छ । दिवंगत चिकित्सक डा. चाँदनी वैद्य, पूर्व निर्देशक डा. सुदीप श्रेष्ठ, डा. आरती शाह र प्रा. डा. विष्णुदत्त पौडेलको योगदानलाई सम्झना गरियो।
