भक्तपुर, २८ बैशाख २०८२
भक्तपुर क्यान्सर अस्पतालमा क्यान्सर बिरामी बालबालिकाको विशेष उपचारका लागि बाल चिकित्सा सघन इकाई स्थापना गरिएको छ ।
आइतबार स्वास्थ्य तथा जनसंख्या मन्त्री प्रदीप पौडेलले एक कार्यक्रमबिच बाल क्यान्सर इकाई उद्घाटन गरेका हुन् ।
बाल क्यान्सर उपचार निःशुल्क कार्यान्वयन गर्ने निर्णय गरेका मन्त्री पौडेलले अस्पतालमा उनीहरूका लागि बेग्लै आईसीयू वार्ड स्थापना गर्न भनेका थिए । सोही अनुसार वैशाख महिनाभित्र वार्ड सञ्चालनमा ल्याउने गरी अस्पतालले थालेको तयारी पूरा भए पछि सेवा सुरु भएको हो ।
सेवा सुरुवात गर्दै स्वास्थ्यमन्त्री पौडेलले भक्तपुर क्यान्सर अस्पताललाई उपचारमा नमुना बनाउँदै विदेश उपचारका लागि जाने संख्या घटाइने लक्ष्य राखिएको बताए ।
अहिले पनि भारतमा विभिन्न उपचारका लागि जानेको संख्या उच्च छ, त्यसैले अस्पतालमा थप सुविधा बढाएर बिरामीले स्वदेशमै सुपथ उपचार पाउने वातावरण तयार पारिने पौडेलले बताए।
मन्त्री पौडेलले बाल क्यान्सर उपचार निःशुल्क गराउँदा राज्यलाई थप भार नपर्ने गरी आन्तरिक श्रोतबाटै व्यवस्थापन गरिएको भन्दै सकेसम्म थप दायित्व नपर्ने गरी विभिन्न किसिमका उपचार सेवा सुधार तथा विस्तार भइरहेको बताए । यसपालि आउने बजेटमा समेत क्यान्सर नियन्त्रणलाई प्राथमिकतामा राखेको उनले बताए ।
थपिएको एकाइमा बालबालिकाको आईसीयूका ४, डे केयरका ४ तथा साधारण ७ शय्या रहने निमित्त कार्यकारी निर्देशक डा. उज्ज्वल चालिसेले बताए ।
अस्पतालमा सेवा विस्तार तथा स्तरोन्नतिका लागि मन्त्री पौडेलले प्राथमिकता दिएर योजना अघि बढाइरहेको डा. चालिसले बताउनु भयो।
