चितवन, ७ पुस २०७९
नेपाल खाद्य आयुर्वेदिक, न्युट्रास्युटिकल तथा कस्मास्युटिकल ( फेनक्यान) संघले डा. चन्दन न्यौपानेको अध्यक्षतामा चितवन शाखाको आज देखि विधिवत रुपमा शुभारम्भ भएको छ।
नारायणी किनार स्थित सिटि बैन्केटमा केन्द्रिय तथा प्रादेशिक कार्यसमितिका पदाधिकारीहरुको उपस्थितिमा चितवन शाखाको कार्यसमितिको गठन भएको हो।
चितवनमा रहेर न्युट्रास्युटिकल तथा कस्मास्युटिकल आयातकर्ताहरुको पटक पटक बैठकपछि व्यवसायिक एकता, व्यवसायिक हकहित तथा शुद्धिकरणका लागि केन्द्रिय समितिसंगको छलफल पश्चात मात्र चितवन शाखा कार्यसमितिको गठन गर्ने निर्णय गरिएको तदर्थ समितिका सचिव सुदीप राज सुवेदीले बताउनुभयो।
त्यसैगरी उपाध्यक्षमा दिनेश रेग्मी, सचिवमा सुदीप राज सुवेदी, सहसचिवमा चिरन्जीवी ढकाल, कोषाध्यक्षमा लक्ष्मण जिसी र सदस्यहरुमा सुजन कोइराला र विरेन्द्र पटेल मनोनित हुनुभएको छ। साथै शाखाको संरक्षकको रुपमा नारायण मल्ल, रामबहादुर पौडेल, अजामिन ढकाल र सुरेश थापा पनि मनोनित हुनुभएको हो।
कार्यक्रममा शुभकामना मन्तव्य व्यक्त गर्दै नारायण मल्लले केन्द्रिय कार्यसमितिलाई चितवनमा स्वागत गरेका थिए। सम्पूर्ण कार्यसमितिका सदस्यहरुलाई केन्द्रिय अध्यक्ष सुरेन्द्र मानन्धरले बधाई ज्ञापन गर्नुभएको छ ।
फेनक्यान केन्द्रिय कार्यसमितिका अध्यक्ष सुरेन्द्र मानन्धरले कार्यक्रममा बोल्दै न्युट्रास्युटिकल व्यवसायलाई मर्यादित बनाउँदै अगाडी बढ्न पनि व्यवसायीहरुलाई आग्रह गर्नुभयो। व्यवसायमा नीतिगत सुधारका निम्ति आँफुहरुले केन्द्रिय स्तरमा लबिङ्ग गर्ने र स्थानीय स्तरमा व्यवसायीहरुलाई पेशागत मर्यादालाई ध्यानमा राख्दै अगाडी बढ्न पनि सुझाउनु भयो। औषधि तथा न्युट्रास्युटिकलको हबको रुपमा र मेडिकल सिटि उपनाममा परिचित चितवन जिल्लामा आएर शाखा सुरुवात गर्न पाउँदा पनि अध्यक्ष मानन्धरले खुसि व्यक्त गरे। कार्यक्रममा बोल्दै मानन्धरले भने, विकसित मुलुकहरूमा आहारपूरक खाद्य पदार्थ ‘फुड सप्लिमेन्ट’ हरूलाई रोगबाट बचाउने चिजको रूपमा लिइन्छ र ओटीसी प्रडक्ट भनेर सर्वत्र उपलब्ध हुन्छ । सजिलै मानिसले उपभोग गर्न पाउँछन् । हाम्रो देशमा भने आहारा पूरक खाद्यपदार्थ ‘फुड सप्लिमेन्ट’ हरूलाई प्रतिबन्धित औषधि भनेर प्रचार गरिन्छ । औषधि नियमन गर्नेहरू फुड सप्लिमेन्टलाई प्रतिबन्धित औषधि भन्न लाज मान्दैनन् । औषधि र फुड सप्लिमेन्टको परिभाषा फरक छ भन्ने कुरा थाहा हुँदाहुँदै पनि नजर अन्दाज गर्छन् ।
सुरुवात देखिने विभिन्न बाधाअड्चन व्यहोरेर यहाँसम्म आइपुगेको फेनक्यान नेपाल सरकारको कृषि तथा पशुपन्छी विकास मन्त्रालय अन्तर्गत खाध्य प्रविधि तथा गुण नियन्त्रण विभागद्वारा अनुमति लिएर संचालन भईरहेको छ। औषधि व्यवस्था विभाग र खाद्य प्रविधिको अन्तर्द्वन्दका कारण पनि व्यवसायीहरु संशंकित बनिरहेको अवस्थामा निर्धक्क भएर व्यवसाय गर्न पनि अध्यक्ष मानन्धरले अनुरोध गरेका छन्। औषधि व्यवस्था विभागले फार्मेसी संचालन निर्देशिका अनुसार औषधि बाहेकका अरु सामाग्रीहरु फार्मेसीबाट बेच्न नपाउने हो भने ७० % व्यवसाय धरासायी हुने अध्यक्ष मानन्धरले बताए। यो विषयमा सम्बन्धित सरोकार निकायहरुसंग नीतिगत छलफलमा निरन्तर लागिरहेको पनि उनले बताएका छन्।
फेनक्यान केन्द्रिय कार्यसमितिका कोषाध्यक्ष प्रदिप कुमार महत्तो, महासचिव शम्भु यादव, केन्द्रिय सदस्य विजय उपाध्याय, बागमती प्रदेश प्रमुख विप्लब रञ्जित लगायतको उपस्थिति रहेको थियो।
फेनक्यानको मूल नारा नै “Prevention is better than cure” रहेको छ भने उक्त कार्यक्रम संचालन नयाँ कार्यसमितिका सचिव सुदीपराज सुवेदीले गर्नुभएको थियो।
