स्याङ्जा, २० मंसिर २०८१
भीरकोट नगरपालिका-१ बयँरघारी बजारमा क्षयरोग खोजपड्ताल शिविर सम्पन्न गरिएको छ। शिविरमा आएका ४३४ जना मध्ये १३ जनामा क्षयरोगका संक्रमण पुष्टि भएको छ।
स्याङ्जाका ११ पालिकामध्ये भीरकोट एक हो। परीक्षण गरिएका मध्ये २ दशमलव ४ प्रतिशतमा क्षयरोगको संक्रमण देखिएको छ। शिविरमा आएका मध्ये ४ सय ३४ जनाले स्वास्थ्य परीक्षण गरेका थिए।
जापान नेपाल स्वास्थ्य तथा क्षयरोग अनुसन्धान संस्था (जन्त्र)को आयोजनामा स्वास्थ्य कार्यालय स्याङ्जाको समन्वय तथा क्षयरोग उपचार केन्द्र पोखराको सहकार्यमा भीरकोट शिविर गरिएको हो।
भिरकोट नगरपालिकाको आयोजना जन्त्र भन्ने संस्थाको समन्वय र स्वास्थ्य कार्यालय स्याङ्जाको समन्वयमा कार्यक्रम सम्पन्न भएको थियो।
एआई पद्धतिको डिजिटल पोर्टेबल आधुनिक मेशिनबाट विशेषज्ञ चिकित्सक सहितको टोलीले छातीको एक्सरे विधिबाट स्वास्थ्य परीक्षणमा गरिएको थियो।
दिर्घरोगी, बयोवृद्धा, क्षयरोगको सम्पर्कमा आएका जोखिमपूर्ण समूहलाई लक्षित गर्दै शिविर आयोजना गरिएको भीरकोटका उपप्रमुख भगवती अर्यालले बताइन्। लाज र डरले रोग लुकाएर बस्न नहुने उनको भनाइ छ। सबै स्वास्थ्य संस्थाबाट निःशुल्क प्राप्त हुने औषधी नियमित सेवन गरेमा समयमै रोग निको हुने हुँदा नडराउन, नआत्तिनु तथा नलुकाउन उनको सुझाव छ।
क्षयरोगको औषधी सबै स्वास्थ्य संस्थाबाट निःशुल्क पाइन्छ। नियमित र चिकित्सकको सल्लाह बमोजिम औषधी सेवन गरे क्षयरोग निको हुन्छ। निरन्तर ज्वरो आउने, खोकी लाग्ने, टाउको दुख्ने, वाकवाक हुने, खकारमा रगत लगायतका लक्षण देखिएमा क्षयरोग हुन सक्ने अनुमान गर्दै स्वास्थ्यकर्मीको सल्लाह लिन क्षयरोग उपचार केन्द्र पोखराका निर्देशक डा. सुनिलराज गौतमको भनाई छ।
आर्थिक वर्ष २०८०/०८१ मा क्षयरोगका संक्रमणबाट १४ जनाको ज्यान गरेको स्वास्थ्य कार्यालय स्याङ्जाका प्रमुख केशव चापागाईंले जानकारी दिनुभयो। चापागाईंका अनुसार गत आर्थिक वर्षमा २८१ जना नयाँ क्षयरोगी भेटिएको छ।
नगरपालिका मध्ये वालिङ नगरपालिकामा ७९, पुतलीबजारमा ४३, गल्याङमा ५०, चापाकोटमा ३३, भीरकोटमा २३ जना छन्।
यसैगरी, फेदीखोला गाउँपालिकामा ६ जना, कालीगण्डकीमा २३, हरिनासमा ५, विरुवामा १०, अर्जुनचौपारीमा ५ र आँधीखोलामा ४ जना क्षयरोगी रहेको स्वास्थ्य कार्यालयले जनाएको छ। यहाँको प्रतिलाख जनसंख्यामध्ये १३४ जना क्षयरोगी भेटिएको कार्यालयले जनाएको छ।
कार्यक्रम बिहान ८ बजे औपचारिक रूपमा सुरु भएको थियो। कार्यक्रमको अध्यक्षतामा भिरकोट नगरपालिकाका उपप्रमुख भगवती रेग्मी अर्यालज्यूको अध्यक्षतामा सम्पन्न भएको थियो।
