सुर्नया गाउँपालिकामा महिनावारीको समस्या अत्यधिक

 बैतडी , ४ असार

बैतडीको सुर्नया गाउँपालिकाका सबै वडाका महिलामा महिनावारीसँग जोडिएका समस्या अत्यधिक देखिएको छ । हेल्थ टुडे मिडियाले सुर्नया गाउँपालिकाको सहयोगमा सञ्चालन गरेका तालिमका सहभागीसँग गरिएको कुराकानी र सर्वेक्षणका क्रममा यस्तो देखिएको हो ।

यौन, प्रजनन् स्वास्थ्य, लैंगिक सवाल, महिनावारी तथा सेनेटरी प्याड निर्माणसम्बन्धी सबै वडामा सञ्चालन भएको तालिमका क्रममा अधिकांस सहभागीले ग्रामीण क्षेत्रमा महिलाले भोग्नु परेका स्वास्थ्य समस्याबारे बताएका थिए । हेल्थ टुडे मिडियाका अध्यक्ष तथा पत्रकार पदमराज जोशीका अनुसार, सहभागीहरुले महिनावारीका बेला तल्लो पेट दुख्ने समस्या धेरैमा रहेको बताएका थिए । यसैगरी गाउँपालिकाका सबैजसो वडामा महिलामा हात खुट्टा तथा जोर्नी दुख्ने समस्या समेत रहेको पाईएको छ ।

तालिमका सहभागीलाई आफ्नो गाउँ, टोल, वडाका महिलामा देखिने पाँच वटा स्वास्थ्य समस्या बारे प्रश्न गरिएको थियो । अधिकांश सहभागीले महिनावारीसम्बन्धी समस्या र जोर्नी दुख्ने, बाउँडिने समस्या रहेको बताएका थिए । यसबाहेक पाठेघर खस्ने, टाउको दुख्ने, रिंगटा लाग्ने जस्ता समस्या समेत रहेको जोशीले बताए । दुई चरणमा सहभागी तालिममा पहिलो चरणमा महिला हिंसा, यौन, प्रजनन् स्वास्थ्य, महिनावारी, गर्भपतन जस्ता विषयमा तालिम दिइएको छ भने दोश्रो चरणमा किशोरीहरुलाई सुरक्षित महिनावारीका लागि सेनेटरी प्याड बनाउन सिकाइएको छ ।

रौलेश्वरमा आयोजित तालिमलाई गाउँपालिका अध्यक्ष वीरबहादुर विष्ट तथा उपाध्यक्ष लिलाकुमारी विष्टले संयुक्त रुपमा उदघाटन गरेका थिए । तालिमपश्चात सबै वडामा किशोरी समूह गठन गरिने तथा उनीहरुलाई हरेक घर घर सम्म प्रजनन स्वास्थ्यका बारेमा जनचेतना फैलाउने र प्याड बनाउन सिकाउने गरी भविष्यमा परिचालिन गरिने योजना रहेको गाउँपालिकाले जनाएको छ ।

तालिममा सुदूरपश्चिम क्षेत्रमा महिला स्वास्थ्यका क्षेत्रमा सात वर्षदेखि काम गर्दै आएका चिकित्सक डा. लोकेन्द्र थापा, स्वास्थ्य क्षेत्रमा क्षमता अभिवृद्धि पैरवी तथा सामाजिक मुद्दामा प्रशिक्षण गर्दै आएका सञ्चारकर्मी गोकर्ण भट्ट, हेल्थ टुडे मिडियाका अध्यक्ष पदमराज जोशी, किशोरी क्षमता अभिवृद्धि सहजकर्ता तथा यो क्षेत्रमा तालिम दिँदै आएका डम्मरी भट्ट, कुन्ति भट्टलगायत जनस्वास्थ्यविद एवं अन्य प्रशिक्षकहरुले प्रशिक्षण दिइरहेका थिए ।

Next Post

Discussion about this post

ADVERTISEMENT