काठमाडौं, २९ चैत्र २०७७
नेपाल फिजियोथेरापी संघले फिजियोथेरापीष्टहरुको सेवाहरुको न्यूनतम सेवा शुल्क र परामर्श शुल्कका साथै न्यूनतम मासिक तलब तोकेको छ।
स्वास्थ्य तथा जनसंख्या मन्त्रालयले नेपालमा कार्यरत फिजियोथेरापीष्टहरुको मासिक तलब, सेवा शुल्क सम्बन्धी कुनै निर्णय नगरेको भन्दै संघले यो कदम उठाएको विज्ञप्ती मार्फत जनाएको छ।
संघका अध्ययक्ष लक्ष्मण अधिकारीले न्यूनतम मासिक तलब निर्धारणसँगै फिजियोथेरापी सेवा प्रदायकहरुले आफ्नो योग्यता र अनुभव अनुसारको न्याय उचित मासिक तलब पाउने विश्वास गरेको बताए।
अधिकारीले न्यूनतम परामर्श शुल्क र सेवा शुल्क निर्धारणले फिजियोथेरापी क्षेत्रमा नयाँ आयामको सुरुवात हुने, गुणस्तरीय सेवा प्रवाहमा थप टेवा पुग्ने र फिजियोथेरापी अभ्यासमा समानता आउने आशा रहेको बताए।
‘नयाँ बर्ष २०७८ को शुरुवातसँगै यस संघले निर्धारण गरेको न्यूनतम सेवा शुल्क, परामर्श शुल्क र मासिक तलब अनुसार फिजियोथेरापीष्टहरुलाई काम गर्न र गराउन सबै सरोकारवालाहरुलाई नेपाल फिजियोथेरापी संघले विज्ञप्ती मार्फत अनुरोध गरेको छ।
न्यूनतम सेवा शुल्क तथा मासिक तलब फिजियोथेरापीष्टहरुको योग्यता र अनुभवको आधारमा निर्धारण गर्दै तलब निर्धारण गर्दा दैनिक ७ घण्टाको कार्यालय समय मान्ने बताइएको छ।
त्यस्तैगरी बिरामीको उपचारमा लाग्ने समय र फिजियोथेरापीष्टको सक्रियताको आधारमा न्यूनतम सेवा शुल्क निर्धारण गर्ने र फिजियोथेरापीष्टहरुले विशेष सीप अथवा प्रविधिको प्रयोग वापत शुल्क लिन पाउने भनिएको छ।
प्रविणता प्रमाणपत्र तह उत्तीर्ण गरेका फिजियोथेरापीष्टहरुकौ पाँच वर्ष अनुभव भएमा १८ हजार देखि २५ हजारसम्म मासिक तलब हुनुपर्ने छ भने स्नातक तह सहित पाँच वर्ष अनुभव रहेकालाई ३० देखि ४० हजार, स्नातकोतर तह र पाँच वर्ष अनुभव भएकालाई ४० देखि ५५ हजारसम्मको मासिक तलब दिनुपर्ने निर्णय गरेको अध्यक्ष अधिकारीले बताएका छन्।
त्यस्तै परामर्श शुल्कको हकमा स्नातक तह सहित पाँच वर्ष अनुभव भएकाले रु ४–५ सय र स्नातकोत्तर हित पाँच वर्ष अनुभव भएकाले रु ५–६ सय लिन पाउनेछन्।
न्यूनतम सेवा शुल्कको हकमा छोटो सत्र (उपचारको समय) भए रु३०० र लामो सत्र भए रु ५०० रहेको छ।
चिकित्सकले बिरामीको घरमै पुगेर सेवा दिए वापत न्यूनतम एक हजार तोकिएको छ।
