काठमाडौं, ४ भाद्र २०७९
स्वास्थ्य तथा जनसंख्या राज्यमन्त्री हीराचन्द्र केसीले औषधि व्यवसायको क्षेत्रलाई मर्यादित, सेवामुलक तथा जनउत्तरदायी बनाउनुपर्ने बताएका छन् ।
काठमाडौंमा आयोजित नेपाल औषधि थोक व्यवसायी संघको प्रथम राष्ट्रिय महाधिवेशन उद्घाटन गर्दै स्वास्थ्य राज्यमन्त्री केसीले गुणस्तरीय औषधि उपभोक्ता सम्म पुर्याउन सरकारले समन्वयकारी भूमिका निर्वाह गर्ने बताउनुभयो।
राज्यमन्त्री केसीले भने, औषधि भन्ने वित्तिकै जनस्वास्थ्य संग प्रत्यक्ष सरोकार राख्ने विषय भएका कारण औषधि जगत निकै संवेदनशिल हुनुपर्छ । अहिलेपनि औषधिको मुल्यमा एकरुपता नभएको गुनासो आइरहेका छन् । यसलाई हल गर्नुपर्ने देखिन्छ ।
राज्यमन्त्री केसीले भने, ‘औषधि जगतमा पछिल्लो समय यो वा त्यो नाममा मोलाउदै आएको अनेकन विकृतिको अन्त्य गर्नुपर्छ । उपभोक्ताको संविधानतः मौलिक हकको रुपमा व्याख्या गरिएको सुलभ मुल्यमा गुणस्तरिय औषधि सेवन गर्न पाउने अधिकारलाई अक्षुण्ण राख्नुपर्छ । ’
यस्तैगरी औषधि थोक व्यवसायी संघका अध्यक्ष शीबराज बास्कोटाले तालुक निकायले समयमा ध्यान नदिँदा औषधि बजारमा विकृति बढेको बताए । उनले भने, औषधि क्षेत्रको विकृती रोक्न संघले पहलकदमी लिएको छ । औषधि व्यवस्था विभाग भने निरीह बन्यो ।
महाधिवेशनमा नेपाल औषधि उत्पादक संघका महासचिव विप्लव अधिकारीले देशभरिबाट आउनु भएका थोक औषधि व्यवसायीहरुलाई बधाई एवं शुभकामना व्यक्त गर्नुभएको छ।
महासचिव अधिकारीले भने; हामीले नेपालमा औषधि उत्पादन गरेर आज सम्म लगभग ७५ प्रतिशत औषधिहरू स्वदेशमै उत्पादन गर्न सफल भएका छौं। जुन यस संस्थाले दिन रात नभनीकन तल्लीन रहेर काम गरिरहेको छ।
देशको अर्थतन्त्र नाजुक एवं संकट अवस्थामा आइपुगेकोले हामी सबै मिलेर नीति परिवर्तनमा सुधार गर्न सकिने र हामी सबै औषधि व्यवसायी संघ मिलेर अगाडि बढ्न सकिने अधिकारीले बताउनुभयो।
महाधिबेशनमा नेपाल औषधि आयातकर्ता संघका महासचिव पवन आचार्यले देशभरबाट सहभागिता भएका औषधि प्रतिनिधिहरुलाई प्रथम राष्ट्रिय महाधिवेशनमा सफलताको शुभकामना व्यक्त गर्नुभयो।
महासचिव आचार्यले २०७४ /२/१९ गतेको मन्त्रिपरिषदको निर्णय अनुसार प्रविधीजन्य स्वास्थ्य सामाग्रीको गुणस्तरको नियमन गर्न औषधि व्यवस्था बिभागलाई दिएको तर ५ बर्ष सम्म पनि सो निर्णय कार्यान्वयन नहुँदा बिरामी हरुले गुणस्तरहीन सामाग्रीको प्रयोग गर्नु पर्ने वाध्यता रहेकाले कैयौं बीरामीको ज्यान समेत गएको र बजारमा ऊक्त सामाग्रीका ब्यापारीहरुले लुटतंत्र मच्याईरहेकोले औषधि व्यवस्था विभागले तत्काल उत्पादक र आयातकर्ताको उद्योग निरीक्षण गरि मापदण्ड पुरा गरेका उद्योगको उत्पादन मात्र बीक्रीबीतरण गर्न पाउने कुराको सुनिश्चितता गर्न गराउन आग्रह गर्नुभयो।
यस्तैगरी फ्यानक्यानका केन्द्रिय अध्यक्ष सुरेन्द्र मानन्धरले विश्वमा अभ्यास भए अनुसार फूडसप्लिमेन्ट नेपाली उपभोक्ताहरुले सहजरुपमा पाउनुपर्ने बताए। यत्र तत्र सर्वत्र पाउने र मानव स्वास्थ्यमा अहम भूमिका राख्ने फूडसप्लीमेन्ट जस्तो वोटिसी बस्तुलाई औषधि ब्यवस्था विभागले औषधि पसलहरुमा राख्न पाँईदैन भनि असहयोग गरेको भनि अध्यक्ष मानन्धरले बिरोध गर्नु भयो।
यसैबिच महाधिवेशनबाट नेपाल औषधि थोक व्यवसायी संघको अध्यक्षमा पुनः शिबराज बास्कोटा सर्वसम्मत चयन भएका छन् । उपाध्यक्षमा श्रीराम पराजुली, माधब अधिकारी, महासचिबमा गणेश नेपाल, सचिवमा सुरज पौडेल, कोषाध्यक्षमा विनोदप्रसाद ढकाल लगायत रहेका छन् ।
