काठमाडौँ, ०८ चैत २०७८
काठमाडौंको कागेश्वरी मनोहरा नगरपालिकाद्धारा संचालित बाबाचोकस्थित मुलपानी नगर अस्पतालमा ३ करोड लगानीमा अक्सिजन प्लान्ट जडान भएको छ ।
गत बैशाख ३० गते सम्पन्न ६९ औं नगरकार्यपालिकाको आकस्मीक बैठकले नगर अस्पतालको लागि अक्सिजन प्लान्ट गरिद गर्न ३ करोड छुट्याउने र खरिद प्रकृया अगाडि बढाउने निर्णय गरेको थियो ।
अस्पतालमा ६ बेडकाे आइसीयु कक्ष (जसमा २ बेडको भेन्टिलेटर रहने) २ बेडकाे भेन्टिलेटर र ५० प्वाईन्टकाे पाईप लाईन सहितकाे अक्सिजन प्लान्ट करिब ३ कराेडकाे लगानीमा सम्पन्न भएको कागेश्वरी मनोहरा नगरपालिकाका नगरप्रमुख कृष्णहरी थापाले जानकारी दिनुभयो।
अस्पतालमा २ वेडको पोष्ट अपरेसन, २ वेडको प्रिअपरेसन वार्ड संचालनको तयारीमा रहेको छ ।
अक्सिजन प्लान्टको काम लगभग सकिएको र स्वास्थ्यकर्मीहरुलाई आवश्यक तालिम दिइरहेकाले केहि दिनमै संचालन हुने नगरपालिकाकी स्वास्थ्य प्रमुख लक्ष्मी कोइरालाले जानकारी दिइन् । आगामी बैशाखबाटै अस्पताल पुर्ण क्षमतामा संचालन हुने गरी काम तीब्र रुपमा भैरहेको स्वास्थ्य प्रमुख कोइरालाको भनाइ छ । उनकाअनुसार आवश्यक स्वास्थ्यकर्मी, बिशेषज्ञ चिकित्सक र कर्मचारी दरबन्दी खुलाउने प्रक्रियामा रहेको छ ।
सार्वजनिक विदाका दिन २४ घण्टा इमर्जेन्सी सेवा प्रदान गर्दै आएको अस्पतालमा २ वटा ओपिडी सेवा, ल्याव, एक्सरे तथा भिडियो एक्सरे, अर्थोपेडिक, छाला तथा चर्मरोग, मनोरोग बिशेषज्ञ सेवा, इएन्टी सेवा, नेपाल नेत्रज्योती संघ त्रिपुरेश्वरसँग समन्वय गरी आँखा उपचार केन्द्र संचालन गर्दै आएको अस्पताल ब्यबस्थापक सन्तोष तिमिल्सिनाले जानकारी दिए । यसका साथै चौबीसै घण्टा प्रसुती सेवा, एम्बुलेन्स सेवा, परिवार नियोजन सेवा प्रदान गर्दै आइरहेको ब्यबस्थापक तिमिल्सिनाले बताए ।
नगरपालिकाको प्रमुख खोप केन्द्रको रुपमा रहेको नगर अस्पतालमा कोरोना भाइरस (कोभिड-१९) संक्रमण सुरु भएदेखि नै कोरोनाको निशुल्क परिक्षण भैरहेको छ । ब्यबस्थापक तिमिल्सिनाका अनुसार कोरोना संक्रमण सुरु भएदेखि करिब ३ हजार जनालाई क्वारेन्टाइनमा राखिएको छ भने २ सयभन्दा बढी कोरोना संक्रमितको उपचार, फिवर क्लिनिक(ज्वरो जाँच गर्ने) मार्फत ३ हजारभन्दा बढी कोरोना संक्रमितको उपचार गरिएको छ । यसैगरी २ सयभन्दा बढी बिरामीलाई बिभिन्न संघसंस्थासँग समन्वय गरी आइसोलेसन किट उपलब्ध गराउनुका साथै नियमित खोप सेवा प्रदान गरिंदै आएको तिमिल्सिनाले बताए।
यस्तै अस्पतालमा कोरोना महामारीका समयमा २५ वटा अक्सिजनसहितका शैंया र ५० वटा आईसोलेसन शैया संचालनमा थिए । कोरोना संक्रमित बोक्ने एउटा छुट्टै एम्बुलेन्सको व्यवस्था गरिएको थियो ।
अपरेसन थियटर बन्ने क्रममा वा योजनामा रहेको छ भने बिरामीको चाप बढ्दै गएकाले थप १० वेडको इमर्जेन्सी कक्ष बन्दै गरेको छ । उक्त इमर्जेन्सी कक्ष २ महिनाभित्र सम्पन्न हुने ब्यबस्थापक तिमिल्सिनाले जानकारी दिए।
