डोटी , १८ पौष २०७७
स्वास्थ्य कार्यालय डोटीको आयोजना र स्वास्थ्य सेवा बिभाग , इपिडेमियोलोजी तथा रोग नियन्त्र महाशाखा टेकु काठमाडौंको आर्थिक तथा प्राबिधिक सहयोगमा डोटी जिल्ला अन्तर्गत कार्यरत चिकित्सक र हेल्थ असिस्टेन्टहरुलाई ६ दिने मानसिक स्वास्थ्य सम्बन्धि तालिम प्रदान गरेर डोटी जिल्लाको सबै स्थानीय तह सम्म मानसिक स्वास्थ्य सेवा बिस्तार गरेको छ ।
विश्व स्वास्थ्य संगठनले दिएको स्वास्थ्यको परिभाषामा हरेक मानिसको शारीरिक , मानसिक , सामाजिक , सम्बेगात्मक र अध्यात्मिक स्वास्थ्य असल भयो भने मात्र मानिसलाई स्वस्थ भन्न सकिन्छ । त्यसै गरि रोग र दुर्वलत़ा पनि हुनु हुदैन । मानिस स्वस्थ हुनका लागि आवश्यक पर्ने यी सबै पक्ष हरु स्वस्थ र तन्दुरुस्त राख्नको लागि व्यक्ति स्वयमले पनि प्रयास गर्नुपर्ने , सरकारी स्वास्थ्य सेवाले पनि यो सबै पक्षलाई समेटेर मानिसहरुलाई स्वास्थ्य राख्नमा बिशेष योगदान दिनु पर्ने हुन्छ तथापि बिगत समयमा व्यक्तिको शारीरिक पक्षलाई मात्र ध्यान दिएर स्वास्थ्य सेवा दिने गरिएको थियो । शारीरिक पक्ष बाहेक अन्य पक्षलाई ध्यान दिन नसकेको अवस्थाले गर्दा समाजमा मानसिक रोगको प्रभाव बढ्दै गएको कुरा बिभिन्न अध्ययनले देखाएको छ । समाजमा बढ्दै गएको मानसिक समस्यालाई सम्बोधन गर्न नेपाल सरकारले मानसिक स्वास्थ्य सेवाको ६ दिने आधारभूत तालिमको प्याकेज बनाएर हरेक पालिका र पालिका अन्तर्गत कार्यरत चिकित्सक र हेल्थ असिस्टेन्ट हरुलाई तालिम दिंदै आएको छ । सोहि क्रममा डोटी जिल्ला अन्तर्गतका ९ वटा पालिकामा कार्यरत ७ जना चिकित्सक सहित कुल २३ जना स्वास्थ्य कर्मीहरुलाई मानसिक स्वास्थ्य सम्बन्धि आधारभूत तालिम दिइएको स्वास्थ्य कार्यालय डोटीमा कार्यरत परिवार नियोजन निरीक्षक सुर्य बिष्टले जानकारी दिनु भएको छ ।
मानसिक स्वास्थ्य सम्बन्धि आधारभूत तालिममा इपिडेमीयोलोजी तथा रोग नियन्त्र महाशाखा टेकु काठमाडौंका नसर्ने रोग तथा मानसिक रोग शाखा प्रमुख डा. फणिन्द्र बराल , बरिष्ठ मानसिक रोग विशेषज्ञ डा बासुदेव कार्की , बरिष्ठ मानसिक रोग विशेषज्ञ डा. दिनेश गिरीले प्रशिक्षण दिएका थिए ।
मानसिक स्वास्थ्य सम्बन्धि आधारभूत तालिम समापन सत्रमा स्वास्थ्य निर्देशनालय राजपुर डोटीका स्वास्थ्य निर्देशक डा. गुणराज अवस्थी ज्युले अहिले बिश्वब्यापी रुपमा मानसिक रोगीको संख्या बढ्दै गएको , नेपाल लगायत सुदूरपश्चिम प्रदेशमा पनि यसको समस्या वृद्धि हुदै गएकोले डोटी जिल्लामा संचालन भएको यस प्रकारको तालिमले केहि हद सम्म भए पनि मानसिक रोगको समस्या न्युनिकरणमा सहयोग पुग्ने , मानसिक रोगको उपचारको लागि प्रदेश मार्फत हरेक स्थानीय तह सम्म बिभिन्न ०८ प्रकारको औषधि उपलब्ध गराइने र तालिम प्राप्त स्वास्थ्यकर्मीले आवश्यकतानुसार उक्त औषधिको प्रयोग गर्नु पर्ने समापन मन्तब्य मा उल्लेख गर्नु भएको छ । साथै उँहाले तालिमका सबै सहभागीहरुलाई स्वास्थ्य संस्थाबाट सम्पादन गर्नु पर्ने काम र क्रियाकलापहरु समयमै सम्पन्न गर्नुपर्ने , अभिलेख राख्नु र्ने र प्रतिबेदन निर्धारित समय भित्र नै सम्बन्धित प्रतिबेदन प्रणाली भित्र प्रविष्टि गरि सक्नु पर्ने तथा आफु सदैब सुदूरपश्चिम प्रदेशको स्वास्थ्य सेवालाई गुणस्तरीय र नमुना स्वास्थ्य सेवा बनाउने अभियानमा लागि परेको हुनाले सो अभियानमा सबैले आ -आफ्नो तर्फ बाट सक्दो सहयोग गर्नु पर्ने र सबै स्वास्थ्यकर्मी र स्वास्थ्य संस्थाहरुले आफुलाई तोकिएको जिम्मेवारी ठिक समयमा सम्पादन गर्नु पर्नेमा जोड दिनु भएको छ ।
Comments 6