धनगढी , १६ पौष २०७७
सुदुरपश्चिम प्रदेश , सामाजिक बिकास मन्त्रालय , स्वास्थ्य निर्देशनालय राजपुर डोटीको आयोजनामा स्वास्थ्य कार्यक्रमहरुको योजना तर्जुमा सम्बन्धि दुई दिने तालिमको आयोजना गरिएको छ ।
नेपालमा संघियता लागु भए देखि आधारभूत स्वास्थ्यको जिम्मेवारी स्थानीय तहको जिम्मेवारीमा परेको छ। स्थानीय तहले स्वास्थ्य कार्यक्रमको योजना बनाउनु पर्दछ । योजना बनाउँदा आवश्यक पर्ने ज्ञान, सिप, क्षमता अभिबृद्धि गर्नको लागि सुदूरपश्चिम प्रदेश स्वास्थ्य निर्देशनालय राजपुर डोटीले दुई दिने तालिमको आयोजना गरेको छ । तालिममा Bottom up approach मा कसरी प्रभावकारी योजना बनाउनु पर्दछ र योजना बनाउदा अपनाउनु पर्ने चरण हरु ७ वटाको बारेमा छलफल हुने कुरा स्वास्थ्य निर्देशनालय राजपुर डोटीका जन स्वास्थ्य अधिकृत श्री ओम प्रकाश जोशीले बताउनु भएको छ ।
स्वास्थ्य निर्देशानालय राजपुर डोटीले डडेल्धुरा र कैलालीका बिभिन्न २० वटा स्थानीय निकायको स्वास्थ्य शाखामा कार्यरत स्वास्थ्यकर्मीहरु बोलाएर तालिम संचालन गरि रहेको छ । तालिममा स्वास्थ्य कार्यालय बैतडीका प्रमुख योगेश प्रसाद भट्ट , स्वास्थ्य कार्यालय कैलालीका प्रमुख लाल बहादुर धामी , स्वास्थ्य निर्देशनालयका क्षय कुष्ठ निरीक्षक मनोज प्रसाद ओझाले सहजिकरणको काम गरिरहेको कुरा समेत आयोजक निकायले जानकारी दिएको छ ।
सहश्राब्दी बिकास लक्ष्य हासिल गर्नको लागी , १५ औ पन्च बर्षीय योजनाको लक्ष्य हासिल गर्न , नेपाल स्वास्थ्य क्षेत्रको रणनीति अनुसारको लक्ष्य हासिल गर्न , राष्ट्रिय स्वास्थ्य नीतिमा उल्लेख भएका कुरा हरु पुरा गर्न र स्वास्थ्य निर्देशनालयले नमुना स्वास्थ्य चौकी तथा नमुना पालिका घोषणाका लागि तय गरेका १७ वटा मापदण्डहरु पुरा गर्नको लागि र सकारात्मक स्वास्थ्य सूचकांक माथि उठाउन र नकारात्मक स्वास्थ्य सूचकांक तल झार्नको लागि स्थानीय तहको क्षमता अभिवृद्धि गर्नु परेको हो । स्थानीय तहले बनाउने स्वास्थ्यका कार्यक्रमहरु प्रभावकारी हुनु पर्ने , लक्ष्य प्राप्त हुन् सक्ने किसिमका क्रियाकलापहरु पहिचान गर्नु पर्ने , कुन बर्ग र समुदायलाई समेट्दा छिटै स्वास्थ्यको लक्ष्य हासिल हुन् सक्छ , त्यस प्रकारका क्रियाकलापहरु पहिचान गरि योजना बनाउन सक्ने क्षमताको बिकास गर्न कार्यक्रम आयोजना भएको हो । साथै आधारभूत स्वास्थ्यको जिम्मेवारी पनि स्थानीय तहकै भएको हुनाले प्रदेशले स्थानीय तहमा कार्यरत स्वास्थ्यकर्मी हरुको योजना तर्जुमा गर्ने सीप वृद्धि गर्न तालिमको आयोजना गरेको कुरा सुदूरपश्चिम प्रदेश स्वास्थ्य निर्देशक डा. गुणराज अवस्थीले बताउनु भएको छ ।
उँहाले प्रदेशको जिम्मेवारी भनेको संघिय सरकार र स्थानीय तह बिचको समन्वयकारी भूमिका रहेको हुनाले संघिय सरकारका सम्बन्धित निकाय संग सुदूरपश्चिम प्रदेशका बासिन्दाहरुको स्वास्थ्य अवस्था सुधारका लागि भरमग्दुर प्रयास गरिरहेको र सोहि अनुसार स्थानीय तह सँग समेत समन्वयको काम गरिरहेको समेत बताउनु भयो ।
