काठमाडौं, २० पुष २०७९
ललितपुरको गोदावरीमा यही पुष २२ गतेदेखि नेपालमा पहिलोपटक अन्तर्राष्ट्रिय स्तरको प्रथम डेण्टल एक्स्पो तथा कन्फ्रेन्स (नेपडेण्ट) हुने भएको छ।
नेपाल दन्त सामग्री वितरक संघले नेपडेण्ट एक्स्पो तथा कन्फ्रेन्स हुन लागेको हो। संघले बुधबार काठमाडौंमा पत्रकार सम्मेलन गरी उक्त सम्मेलन २२ देखि २४ गतेसम्म सञ्चालन हुने जानकारी दिएको छ। डेण्टल एक्स्पो तथा नेपडेण्ट गोदावरीको सनराइज कन्भेन्सन सेन्टरमा हुनेछ।
दन्त सामग्री वितरक संघको एक्स्पो र नेपाल डेण्टल एशोसिएसनको कन्फ्रेन्स एकै पटक हुन लागेको हो।
७० बढी स्टल रहने एक्स्पोमा १ सय भन्दा बढी ब्राण्डका सामग्रीहरु राखिने दन्त सामग्री वितरक संघका अध्यक्ष सालिकराम अर्यालले जानकारी दिनुभयो। उक्त सम्मेलनमा नेपाल सहित, भारत, बंगलादेश, चीन, कोरिया र जपान लगायतका राष्ट्रबाट पनि दन्त चिकित्सकहरुको सहभागी रहने भएको छ।
डेण्टल एक्स्पोमा २४ जना दन्त चिकित्सकहरुले प्रस्तुतीकरण दिने नेपाल डेण्टल एशोसिएसनका केन्द्रीय सदस्य डा. हरिप्रसाद ओलीले जानकारी दिए। एक्स्पोमा करिब ३५ सय भन्दा बढीले अवलोकन गर्ने बितरक संघको अनुमान छ।
नेपडेण्ट मेलामा नेपाल डेण्टल एशोसिएसनलाई मात्र सहभागी गराउन लागिएको कुरा गलत रहेको समेत डा. ओलीले पत्रकार सम्मेलनमा बताएको छ। एक्स्पो तथा नेपडेन्टमा नेपाल डेण्टल एशोसिएसनको मिडइयर कन्फ्रेन्स र साइन्टिफिक सेसन समेत हुने अध्यक्ष अर्यालले बताउनुभयो।
