धनगढी , ६ पौष २०७७
सुदूरपश्चिम प्रदेशका नौ वटा जिल्लाका कोरोना उच्च जोखिम क्षेत्रमा कोभिड १९ को संक्रमण पहिचानको लागि एन्टीजेन जांच हुने भएको छ ।
सुदूरपश्चिम प्रदेश स्वास्थ्य निर्देशनालय राजापुर डोटीको आयोजना र स्वास्थ्य सेवा बिभाग , इपिडेमियोलोजी तथा रोग नियन्त्रण महाशाखा टेकु काठमान्डौको सहजीकरणमा पौष ०६ गते धनगढीमा आयोजित एक अन्तरक्रिया कार्यक्रममा इपिडेमियोलोजी तथा रोग नियन्त्रण महाशाखा टेकु काठमान्डौका निर्देशक डा. बासुदेव पाण्डेयले कोरोना उच्च जोखिम क्षेत्रमा कोभिडको एन्टीजेन जाँच गरिने कुरा जानकारी दिनु भएको छ ।
कोभिड १९ सन् २०१९ डिसेम्बर ३१ मा चिनको वुहान सहरमा पहिलो पटक पत्ता लागेको थियो । यो नयाँ भाइरसको संक्रमण संसार भरि फैलिन कुनै बेर नै लागेन । हाल संसारका सबै देश यस रोगबाट प्रभावित भएका छन् । आजका मिति सम्म संसारमा कोभिड १९ बाट ७ करोड ७२ लाख बढी मानिस संक्रमित भै सकेका छन् भने १७ लाख बढी मानिसको मृत्यु समेत भै सकेको छ । नेपालमा यस रोगबाट २ लाख ५४ हजार बढी मानिस प्रभावित भएका छन् भने १७९५ मानिस को ज्यान समेत गइ सकेको छ ।
रोग शुरुवात हुने बेलामा यस रोगको पहिचानको नेपालमा कुनै सुबिधा नै थिएन । कोभिड १९ को नमुना विदेश लगेर जाँच गरिएको थियो भने हाल देशभरी कोभिड १९ को जाँचको लागि ८० वटा पी सि आर प्रभावित. स्थापना भै सकेका छन् । अहिले नेपालमा पी सि आर प्रबिधि बाट कोभिड १९ को नमुना जांच हुदै आएको छ । पी सि आर प्रबिधि अत्यन्त भरपर्दो बिधि भए पनि अत्यन्त जटिल , महँगो प्रबिधि हो । साथै समुदाय स्तरमा संकलन गरिएको नमुना पी सि आर प्रयोगशाला सम्म ल्याई जाँच गर्न समय लाग्ने र र नतिजा आउदा यदि कुनै व्यक्ति समुदायमा संक्रमित भएमा थप रोग फैलिन सक्ने सम्भावना रहेको हुनाले तुरुन्तै रोगको जांच गर्न सकिने प्रबिधि कोभिड १९ को एन्टीजेन जाँच हो र हाललाइ यो प्रबिधि कोरोना को उच्च जोखिम क्षेत्रमा प्रयोग गरिने कुरा स्वास्थ्य तथा जनसंख्या मन्त्रालयका Incident Command System संयोजक डा. गुणराज लोहनीले बताउनु भएको छ ।
सुदूरपश्चिम प्रदेशमा कोभिड १९ को लागि हाल ६ वटा पी सि आर प्रयोगशालाबाट नमुना जाँच भइरहेको छ । जति बेला कोभिड शुरु भएको थियो त्यति बेला सुदूरपश्चिम प्रदेशबाट कोभिड १९ का नमुनाहरु काठमाडौंमै सम्म लगि जाँच गर्नु पर्ने अवस्था थियो । हाल त्यो अवस्था नरहेको र प्रदेशमै दैनिक ६ हजार जति नमुना जांच गर्न सक्ने गरि क्षमता बनेको छ । त्यो संगै नेपाल सरकार स्वास्थ्य तथा जनसंख्या मन्त्रालयले नीतिगत निर्णय गरि कोभिड १९ को एन्टीजेन जाँच गर्ने ब्यबस्था गरेको हुनाले सुदूरपश्चिम प्रदेशका कोरोना उच्च जोखिम क्षेत्रमा प्राबिधिक हरुको टोलि खटाएर कोभिड १९ को एन्टीजेन जाँच गरिने कुरा सुदूरपश्चिम प्रदेश स्वास्थ्य निर्देशक डा. गुणराज अवस्थीले बताउनु भएको छ ।
प्रदेशलाई हाल ७५०० एन्टीजेन उपलब्ध भै सकेको र निकट भबिष्यमा थप १४५०० आपूर्ति हुने गरि कुल २२००० पहिलो चरणमा एन्टीजेन उपलब्ध हुने र यसरि उपलब्ध भएको एन्टीजेन पहिलो चरणमा कैलाली र कंचनपुरका कोरोना हट स्पट क्षेत्रमा टोली परिचालन गरि कोभिड को संक्रमण जांच हुने कुरा समेत स्वास्थ्य निर्देशक डा. गुणराज अवस्थीले जोड दिनु भएको छ । दोश्रो चरणमा. डोटी र अछाम तथा त्यस पछी अन्य जिल्लामा समेत एन्टीजेन जाँच गर्ने गरि योजना बनाएको कुरा स्वास्थ्य निर्देशनालय राजपुर डोटीका कोभिड फोकल व्यक्ति हेमराज जोशीले जानकारी दिनु भएको छ ।
