काठमाडौंका विभिन्न अस्पतालमा हैजाका दुई जना शंकास्पद बिरामी फेला परेका छन्। इपिडिमियोलोजी तथा रोग नियन्त्रण महाशाखा (EDCD) का अनुसार बलम्बुस्थित सशस्त्र प्रहरी बल अस्पताल र टेकुस्थित शुक्रराज ट्रपिकल तथा सरुवा रोग अस्पतालमा उपचारका लागि आएका बिरामीमा र्यापिड डाइग्नोस्टिक टेस्ट (RDT) मार्फत हैजाको प्रारम्भिक संकेत देखिएको हो।
झाडापखाला र बान्ताको लक्षण भएपछि अस्पताल पुगेका ती बिरामीहरूको हाल कल्चर परीक्षण भइरहेको छ, जसको अन्तिम रिपोर्ट आउन करिब ४८ घण्टा लाग्नेछ। महाशाखाका रोग निगरानी शाखा प्रमुख हेमराज पाण्डेले आरडीटीको नतिजा मात्रै हैजा पुष्टि गर्ने आधार नभएको र कल्चर रिपोर्ट आएपछि मात्र थप प्रक्रिया अघि बढाइने जानकारी दिएका छन्।
महाशाखाका प्रमुख डा. अनुज भट्टचनले संक्रामक रोगको व्यवस्थापनका लागि आवश्यक औषधि, किट र सामग्रीहरू पर्याप्त मात्रामा तयारी अवस्थामा रहेको बताएका छन्। महाशाखाको प्रतिवेदन अनुसार सन् २०२६ मा नेपालभर हालसम्म ४४ जना शंकास्पद हैजाका र ३,६३२ जना झाडापखालाका बिरामी फेला परिसकेका छन्।
