डडेल्धुरा, १८ असार २०७९
डडेल्धुराको भागेश्वरलाई अषाढ ११ गते पूर्ण खोप सुनिश्चितता गाउँपालिका घोषणा गरिएको छ । राष्ट्रिय पूर्ण खोप निर्देशिका बमोजिम सम्पुर्ण प्रक्रिया पुरा गरेपछि घोषणा गरिएको हो ।
पूर्ण खोप घोषणाका लागि जन्मेदेखि १५ महिनासम्मका सबै बालबालिकालाई १५ महिनाको उमेरभित्र पाउनुपर्ने सबै खोप अनिवार्य दिनुपर्छ ।
गाउँपालिकाका अध्यक्ष हेमराज चटौतको अध्यक्षता, जिल्ला समन्वय समितिका प्रमुख गगन सिंह भण्डारीको प्रमुख आथित्यमा र स्वास्थ्य कार्यालयका कोल्ड चेन अधिकृत निरीक्षक कृष्ण राज ओझाको विशिष्ट अथितिमा कार्यक्रम शुरु भएको थियो।
भागेश्वर गाउँपालिका अध्यक्ष हेम राज चटौतले एक औपचारिक समारोहका बीच पूर्ण खोप गाउँपालिका भएको घोषणा गरेका हुन् । सो कार्यक्रमलाई सम्बोधन गर्दै जिल्ला समन्वय समिति डडेल्धुराका संयोजक गगन सिंह भण्डारीले घोषणा गर्ने मात्र नभएर आगामी दिनमा पनि खोप अभियानलाई निरन्तरता दिन सक्नुपर्ने बताए । उनले पूर्ण खोप घोषणा गर्दै गर्दा महिला स्वास्थ्य स्वयं सेविकाको योगदानलाई गाउँपालिकाले भुल्न नहुने सुझाव दिए ।
गाउँपालिका अध्यक्ष चटौतले सबैको सहयोग र सहकार्यले गाउँपालिकालाई पूर्ण खोप घोषणा गर्न सम्भव भएको बताए । गाउँपालिकाले स्वास्थ्य क्षेत्रका लागि बार्षिक रुपमा करोडौं बजेट खर्च गर्दै आएको जानकारी गराउँदै उनले महिला स्वास्थ्य स्वयं सेविकाको योगदानलाई कदर गर्दै सेवा, सुबिधा दिइरहेको बताए । गाउँपालिकाले शिक्षा र स्वास्थ्य क्षेत्रलाई उच्च प्राथमिकता दिएको चटौतले जोड दिए ।
कार्यक्रममा विशिष्ट अथिति स्वास्थ्य कार्यालय डडेल्धुराका कोल्ड चेन अधिकृत निरीक्षक कृष्ण राज ओझाले सबै गाउँपालिका र नगरपालिकाले पूर्ण खोप पालिका घोषणा गरिसकेपछि यसै वर्ष भित्र जिल्लालाई घोषणा गरिने बताए ।
गाउँपालिकाका प्रमुख प्रशासकीय अधिकृत हर्स बहादुर रोकाले पूर्ण खोप घोषणा गरेपनि समय–समयमा अनुगमन गरिने बताए । उनले भने, ‘अहिले घोषणा गरेपनि पछि कुनै समस्या आउन सक्छन्, यस अभियानमा हामी सक्रिय रुपले लाग्ने छौं, यो घोषणा पूर्ण रुपले कार्यान्वयन होस् ।’
गाउँपालिकाका स्वास्थ्य शाखा प्रमुख मान बहादुर साहुले आगामी दिनमा खोप लगाउन योग्य बालबालिकालाई पूर्ण खोप दिनका लागि वडा स्तरमा खोपको दिगोपना कार्यक्रम सञ्चालन गरिने उनको भनाइ छ । आफ्नो वडाका कार्य क्षेत्रका हरेक घर दुरीमा गइ जन्मेदेखि १५ महिनाका बालबालिकालाई लाईन गर्ने तथा १६ देखि २३ महिना सर्वेक्षण गर्ने काम पुरा भएको साहुको भनाइ छ।
कार्यक्रममा गाउँपालिकाका जननिर्वाचित प्रतिनिधि, कर्मचारी, महिला स्वास्थ्य स्वयंसेविका लगायतका व्यक्तिहरुको उपस्थिति रहेको थियो।
२०७८ साल माघ २० गते पूर्व गाउँपालिकाकी अध्यक्ष कौशिला भट्ट ज्यूको अध्यक्षतामा पूर्ण खोप सुनिश्चितता गर्ने निर्णय गरेको थियो।
