हात्तीपाईले रोगको निवारण अवस्था थाहा पाउन कंचनपुरमा सर्भेक्षण हुँदै #AssessmentSurvey

महेन्द्रनगर १४ पौष , २०७७

स्वास्थ्य कार्यालय कन्चनपुरको आयोजना र किटजन्य रोग अनुसन्धान तथा तालिम केन्द्र हेटौडाको आर्थिक तथा प्राबिधिक सहयोगमा सरोकारवालाहरुको लागि महेन्द्रनगरमा एक दिने हात्तीपाईले रोग निवारण अभियान सम्बन्धिको अन्तरक्रिया कार्यक्रममा हात्तीपाईले रोगको अवस्था थाहा पाउन सर्भेक्षण गरिन लागेको जानकारी गरिएको छ ।

नेपाल सरकार हात्तीपाईले रोग निवारण अभियानको राष्ट्रिय रणनीति अनुसार ५ वर्ष सम्म लगातार आम औषधि सेवन अभियान सम्पन्न गरि सके पछी Pre Transmission Assessment Survey को काम गरिन्छ । कन्चनपुरमा भने ५ वर्ष पछी भएको उक्त सर्भेक्षणमा जिल्लामा आशातित रुपमा हात्तीपाईले रोगको भार नघटेको हुनाले पुनः दुइ वर्ष आम औषधि सेवन अभियान सम्पन्न गरि सके पछी फेरी Pre Transmission Assessment Survey को काम गरिन्छ । कंचनपुर जिल्लामा त्यसरी थप दुइ वर्ष आम औषधि सेवन गरि सके पछी गरिएको Pre Transmission Assessment Survey मा हात्तीपाईलेको प्रभाव आशातित रुपमा घटेको थियो । Pre Transmission Assessment Survey मा सफल हुने जिल्लाहरुमा थप एक वर्ष आम औषधि सेवन अभियान सम्पन्न गरिन्छ र सोहि रणनीति अनुसार कंचनपुर जिल्लामा पनि आठ चरण आम औषधि सेवन अभियान गत वर्ष सम्पन्न भएको थियो । आठ चरण पछी अब Transmission Assessment Survey 1 सम्पन्न हुने गरि कार्यक्रम तर्जुमा भएको किटजन्य रोग अनुसन्धान तथा तालिम केन्द्र हेटौडाका इन्टोमोलोजिस्ट तथा सर्भेक्षण टोलीका संयोजक शिशिर कुमार पन्तले जानकारी दिनु भएको छ ।

हात्तीपाईले रोगको प्रभाव दर एक प्रतिशत भन्दा कम आएमा मात्र राष्ट्रिय लक्ष्य हाशिल हुने गर्दछ । यस पटकको सर्भेक्षणमा कंचनपुर जिल्लामा रोगको प्रभाव दर जांच हुने छ । जिल्लाका लालझाडी गाउपालिकाका दुइ वटा वार्ड, पुनर्वास नगरपालिकाका दुइ वटा वार्ड र बेलौरी नगरपालिकाका एक वटा वार्ड गरि कुल १५५२ जना ६ देखि ७ वर्ष सम्मका बालबालिकाहरुको नमुना जाँच गरि रोगको प्रभाव घटे नघटेको कुरा पत्ता लगाइने कुरा स्वास्थ्य कार्यालय कन्चनपुरका प्रमुख शिव राज सुनारले जानकारी दिनु भएको छ । नमुनाको रुपमा जाँच गरिएका बालबालिकाहरुमा हात्तीपाईले रोगको संक्रमण देखिएन भने त्यसपछी थप आम औषधि सेवन अभियान संचालन हुने छैन तर रोगको भार नघटेको अवस्था रहिरह्यो भने पुनः एक चरण आम औषधि सेवन अभियान कंचनपुर जिल्लामा संचालन हुनेछ ।

अन्तरक्रिया कार्यक्रममा जिल्ला समन्वय समिति कंचनपुरका प्रमुख फैरु तामांग , प्रमुख जिल्ला अधिकारी राम कुमार महतो , प्रहरी उपरीक्षक लगायत तिन वटै सुरक्षा निकाय , भीमदत्त नगरपालिका उप प्रमुख सुशिला चन्द सिंह , संचारकर्मी, स्वास्थ्यकर्मी लगायतको उपस्थिति रहेको कुरा स्वास्थ्य कार्यालय कंचनपुरका कार्यक्रम फोकल व्यक्ति सिद्ध राज भट्टले जानकारी दिनु भएको छ ।