काठमाडौँ, १८ चैत २०७८
समय सन्दर्भ पाक्षिकका प्रधान सम्पादक पत्रकार डिल्ली राम भट्टराईलाई ‘आचार्य चरक आयुर्वेद पत्रकारिता पुरस्कार’ दिइएको छ ।
शुक्रबारबाट सुरु भएको नेपाल आयुर्वेद चिकित्सक संघको १०औं राष्ट्रिय सम्मेलनका अवसरमा पत्रकार भट्टराईलाई संघले सो पुरस्कार दिइएको हो ।
खानेपानी मन्त्री तथा कार्यक्रमका प्रमुख अतिथि उमाकान्त चौधरीले सो पुरस्कार हस्तान्तरण गरेका थिए । उक्त पुरस्कारमा रु. १० हजार नगदसहित सम्मानपत्र रहेको छ । यो पुरस्कारलाई डा. सरिता श्रेष्ठले प्रायोजन गरेकी हुन् ।
आयुर्वेद क्षेत्रमा बिगत लामो समय देखि श्रीवृद्धिका लागि पत्रकार भट्टराईले निरन्तर कलम चलाइरहेकोले सम्मान स्वरुप सो पुरस्कार दिइएको संघले जनाएको छ । पाक्षिक रुपमा प्रकाशन हुने समय सन्दर्भ पत्रिकाले १० वर्ष पुरा गरिसकेको छ । पत्रिकाले प्रकाशनको सुरुवातदेखि नै आयुर्वेद क्षेत्रको विशेष कभर गर्दै आएको छ ।
संघका अध्यक्ष डा. प्रकाश ज्ञवालीको सभापतित्वमा भएको सम्मेलनको समुद्घाटन कार्यक्रममा आयुर्वेदसँग सम्बन्धित विभिन्न संघसंस्थाका प्रतिनिधिहरु, नेपाल सरकारका आयुर्वेद र स्वास्थ्यसँग सम्बन्धित निकायका प्रतिनिधिहरु, संघका पदाधिकारी तथा सदस्यहरु, देशभरका आयुर्वेद चिकित्सकहरु लगायतको सहभागिता रहेको थियो ।
कार्यक्रममा तुलसी गोपाल आयुर्वेद कृति पुरस्कार डा. काशीराज शर्मा सुवेदीलाई र डा. सरिता श्रेष्ठ आयुर्वेद प्रोत्साहन पुरस्कार डा. श्याम हरी अधिकारीलाई प्रदान गरिएको थियो ।
