ललितपुर, २४ जेठ २०७८
सानेपास्थित स्टार अस्पतालले नेपालमा पहिलो पटक न्युट्रालाइजिङ एन्टीबडी सम्बन्धि जाँच गर्न शुरु गरेको छ।
अस्पतालका प्रयोगशाला इन्चार्ज एवं मोर्डन टेक्निकल कलेजका प्रिन्सिपल गोविन्द अकेलाले ‘सम्भवत नेपालमै पहिलो पटक हामीले यो प्रविधि भित्र्याएका छौँ । यसले खोप पछि विकास हुनुपर्ने एन्टीवडी विकास भएको छ कि छैन् ? खोप पछि तपाईँ कति सुरक्षित हुनुहुन्छ त्यसबारेमा जान्न सकिन्छ ।’
कन्फ्युजनमा रहेका व्यक्तिहरुले यो जाँच गरि ढुक्क भएर बस्न सकिने पनि अकेलाले बताए । एक घण्टामै रिपोर्ट आउने यो जाँचको लागि अस्पतालले १ हजार ५ सय रुपैयाँ शुल्क तोकेको छ ।
न्युट्रालाइजिङ एन्टीबडी जाँच के हो?
कोभिड १९ को विरुद्धमा रोग प्रतिरोधात्मक क्षमताको विकासको बारेमा थाहा पाउन न्युट्रालाइजिङ एन्टीबडी जाँच गरिन्छ । सामान्यत कोभिड १९ को संक्रमण पछि र खोप लगाईसकेपछि प्रायजसो व्यक्तिहरुमा एन्टीबडीको विकास हुने गर्दछ । महत्वपूर्ण कुरा के छ भने सबैमा न्युट्रालाइजिङ एन्टीबडीको विकास हुन्छ भन्ने हुँदैन।
न्युट्रालाइजिङ एन्टीबडी विकास भएको छ कि छैन् भनेर जाँच गर्ने विधि नै न्युट्रालाइजिङ एन्टीबडी जाँच हो । कोभिड १९ को संक्रमण पश्चात अथवा खोप लगाईसकेपछि शरीरमा न्युट्रालाइजिङ एन्टीबडी विकास हुन्छ ।
यो एन्टीबडीले भाइरसको रिसेप्टर वाइन्डिङ डोमेनलाई हाम्रो शरीरको कोषहरुसंग अन्तरक्रिया गर्नबाट जोगाउँछ । जसले गर्दा भाइरस हाम्रो शरीरको विभिन्न अंगहरुमा सजिलैसंग फैलिन पाउँदैन । कोभिड १९ का कारण देखिने जटिल लक्षणहरु देखा पर्दैन ।
अकेलाका अनुसार यो जाँच गर्दा खोपले कति काम गरेको छ भन्ने कुराको एकीन गर्न सकिन्छ । खोपले काम गरेको छ कि छैन थाहा हुन्छ ।
