नेपाली औषधि उत्पादन क्षेत्रमा सक्रिय सोपान फर्मास्युटिकल्स लिमिटेडले आजदेखि सर्वसाधारणका लागि आइपिओ निष्कासन सुरु गरेको छ।
यसअघि सोपानले वैशाख २ गतेदेखि नै निष्कासन गर्ने तालिका भए पनि सरकारले आइतबार सार्वजनिक बिदा दिएका कारण प्रक्रिया एक दिन ढिलाइ हुँदै आजदेखि औपचारिक रूपमा सुरु भएको हो।
सोपान कम्पनीले आफ्नो जारी पूँजीको २५ प्रतिशत अर्थात् ४२ लाख ९० हजार कित्ता सेयर निष्कासनका लागि नेपाल धितोपत्र बोर्डबाट अनुमति पाएको थियो। जसमध्ये वैदेशिक रोजगारीमा रहेका नेपालीहरूका लागि ४ लाख २९ हजार कित्ता सेयर यसअघि नै बाँडफाँट भइसकेको छ भने बाँकी ३४ लाख ७४ हजार ९०० कित्ता सेयरमा अब सर्वसाधारणले आवेदन दिन सक्नेछन्।
इच्छुक लगानीकर्ताहरुले यस आईपीओमा न्यूनतम १० कित्तादेखि अधिकतम ११ हजार कित्तासम्मका लागि छिटोमा वैशाख ८ गते र ढिलोमा वैशाख १७ गतेसम्म आवेदन दिन सक्नेछन्।
ललितपुरको महालक्ष्मीस्थानमा यसको मुख्य कार्यालय रहेको छ। यस कम्पनीले २०७८ सालदेखि औषधि उत्पादन सुरु गरेको हो र हालसम्म १३९ प्रकारका औषधिको उत्पादन अनुमति प्राप्त गरिसकेको छ। आईपीओबाट संकलित रकम बैंकको ऋण भुक्तानी, नयाँ परियोजना विस्तार र चालु पूँजी व्यवस्थापनमा प्रयोग गर्ने कम्पनीको लक्ष्य रहेको छ।
एनएमबि क्यापिटल बिक्री प्रबन्धक रहेको यस निष्कासनमा लगानीकर्ताले सी–आस्बा सदस्य बैंक तथा वित्तीय संस्था र ‘मेरो शेयर’ मार्फत सहजै आवेदन दिन सक्ने व्यवस्था मिलाइएको छ। वित्तीय अवस्थाका आधारमा कम्पनीको स्थिति मध्यम रूपमा सन्तोषजनक देखिएको छ।
यस कम्पनीले चालु आर्थिक वर्षको दोस्रो त्रैमासको अपरिष्कृत विवरण अनुसार कम्पनी ३३ करोड ८० लाख रुपैयाँभन्दा बढी सञ्चित नाफामा छ भने कम्पनीको प्रतिसेयर नेटवर्थ ९२ रुपैयाँ १५ पैसा र प्रतिसेयर आम्दानी १८ रुपैयाँ ३३ पैसा रहेको छ।
केयर रेटिङ नेपालले कम्पनीलाई ‘केयर एनपी बी’ रेटिङ प्रदान गरेको छ, जसले वित्तीय दायित्व वहन गर्ने क्षमतामा उच्च जोखिम रहेको संकेत गर्ने हुँदा लगानीकर्ताले रेटिङको विस्तृत विश्लेषण गरेर मात्र लगानी गर्नु बुद्धिमानी हुने देखिन्छ। आईपीओ निष्कासन र बाँडफाँटपछि कम्पनीको चुक्तापूँजी १ अर्ब ७१ करोड ६० लाख रुपैयाँ पुग्नेछ, जसमा संस्थापकको हिस्सा ७५ प्रतिशत कायम हुनेछ।
दोस्रो बजारमा कम्पनीको ओपनिङ रेन्जका विषयमा पनि लगानीकर्तामाझ चासो बढेको छ। नेप्सेले २०८२ फागुन १ देखि लागू गरेको नयाँ नियमअनुसार, नेटवर्थ १०० रुपैयाँभन्दा कम भएका कम्पनीको पहिलो कारोबार मूल्य सोही नेटवर्थलाई आधार मानेर निर्धारण गरिन्छ।
सोपानको नेटवर्थ ९२ रुपैयाँ १५ पैसा रहेकाले यसको पहिलो कारोबारका लागि न्यूनतम ९२ रुपैयाँ १५ पैसा देखि अधिकतम २७६ रुपैयाँ ४५ पैसासम्मको ओपनिङ रेन्ज तोकिने सम्भावना छ।
