काठमाडौं, ०३ जेठ २०७९
बैतडीको डिलाशैनी गाउँपालिकाको अध्यक्षमा स्वतन्त्र उम्मेदवार दिएका जन स्वास्थ्यकर्मी सन्तोषप्रकाश जोशी विजयी भएका छन् ।
गठबन्धनका तर्फबाट अध्यक्षका उम्मेदवार माओवादी केन्द्रका लोकेन्द्र राना (शितल) लाई पछि पार्दै उनी अध्यक्षमा विजयी भएका हुन् । जोशीले ३ हजार १८९ मत प्राप्त गरे भने रानाले २ हजार ६४१ मत प्राप्त गरे ।
यस्तै उपाध्यक्षमा भने नेपाली कांग्रेसका भगीरथ बोहरा विजयी भएका छन् । उनले ३ हजार ८७३ मत प्राप्त गरे भने उनका निकटतम् प्रतिस्पर्धी एमालेका लिलावती जोशीले २ हजार ७७९ मत पाइन् ।
यस्तै डिलाशैनीका ७ वडा मध्ये ३ वडामा स्वतन्त्र उम्मेदवार विजयी भएका छन् भने एमाले र कांग्रेस दुई÷दुई वडामा विजयी भएका छन् । वडा नं १ मा कांग्रेसका कृष्णकुमार धामी, वडा नं २ मा एमालेका नवराज घरडी,वडा नं ३ मा एमालेका रघुबीर बोहरा, वडा नं ४ मा स्वतन्त्रका हरिदत्त पन्त, वडा नं ५ स्वतन्त्रका यज्ञराज भट्ट, वडा नं ६ मा कांग्रेसका उत्तरबहादुर बोहरा र वडा नं ७ मा स्वतन्त्रका प्रकाशमणी भट्ट विजयी भएका छन् ।
पालिका अध्यक्षमा निर्वाचित जोशी एमालेबाट विद्रोह गरेर स्वतन्त्रबाट चुनावी मैदानमा उत्रेका थिए । एमालेको युवा संगठन राष्ट्रिय युवा संघको सुदूरपश्चिम प्रदेश अध्यक्ष समेत रहेका जोशीले पार्टीका सबै संगठनबाट राजीनामा गरेर चुनावी मैदानमा होमिएका थिए । पुतली चुनाव चिन्ह लिएर चुनावी मैदानमा उत्रेका उनी तीन जना वडा अध्यक्ष सहित निर्वाचित भएका छन् ।
एमालेका जिल्ला अध्यक्ष सुरेन्द्र पालसंगको टक्करकै कारण उनले पार्टीबाट विद्रोह गरेका हुन् । पार्टीबाट टिकट पाउन नसकेपछि जोशी स्वतन्त्र उम्मेदवार बनेका थिए ।
