आज १२ मे विश्वभर (इन्टरन्यासनल नर्सेस डे) अन्तर्राष्ट्रिय नर्स दिवस मनाइएको छ । विश्व नर्स दिवसको यस बर्षको नारा ‘आवर नर्सेस आवर फ्युचर, इम्पावर्ड नर्सेस सेभ लाइफ’ रहेको छ ।
यसै सन्दर्भमा काठमाडौंको चावहिलस्थित ॐ हस्पिटल एण्ड रिसर्च सेन्टर प्रा.लि. मा पनि हरेक बर्ष झै बिबिध कार्यक्रम सहित यो दिवस मनाइएको छ ।
हस्पिटलका अध्यक्ष समेत रहनुभएका सिनियर कन्सल्ट्यान्ट रेडियोलोजिष्ट डा. आनन्द प्रसाद श्रेष्ठको प्रमुख अतिथ्यमा तथा ॐ हस्पिटलकी नर्सिङ डाइरेक्टर उमा श्रेष्ठको सभापतित्वमा भएको कार्यक्रममा ॐ हस्पिटलको नर्सिङ विभागका तर्फबाट विविध कार्यक्रमहरु समेत प्रस्तुत गरिएको थियो ।
कार्यक्रममा नर्स दिवसको महत्व र नर्सहरुको जिम्मेवारी बारे जानकारीमूलक प्रस्तुतिहरुसँगै नर्स दिवसको शुभकामना समेत आदानप्रदान गरिएको थियो ।
कार्यक्रममा ॐ हस्पिटलका संचालक समेत रहनुभएका वरिष्ठ स्त्री तथा प्रसुती विशेषज्ञ प्रा. डा. जागेश्वर गौतम, ॐ हस्पिटलका प्रमुख कार्यकारी अधिकृत यम बहादुर महत, अस्पतालका मेडिकल डाइरेक्टर डा. हरिश जोशी तथा ॐ हस्पिटल कर्मचारी युनियनका संरक्षक केशव प्रसाद चौलागाईँले शुभकामना व्यक्त गर्नुभएको थियो ।
त्यसैगरी, नर्सिङ विभाग अन्तर्गत बिभिन्न वार्डमा कार्यरत नर्सिङ स्टाफहरुका तर्फबाट बक्तृत्वकला, हाजिरी जवाफ, नाटक लगायतका बिबिध मनोञ्जनात्मक कार्यक्रमहरुपनि प्रस्तुत गरिएको थियो ।
हाजिरी जवाफ प्रतियोगितामा जिन वाट्सन समूह प्रथम स्थान, फ्लोरेन्स नाइटिङ्गेलले द्वितिय स्थान, न्यूम्यान्स समूहले तृतिय र लिडिया हल समूहले चौथो स्थान हाँसिल गरेका थिए ।
त्यसैगरी, ‘आवर नर्सेस आवर फ्युचर, इम्पावर्ड नर्सेस सेभ लाइफ’ शिर्षकमा आयोजित बक्तृत्वकला प्रतियोगितामा पोष्ट अपरेटिभ वार्डबाट सहभागि हुनुभएकी रजिष्टर्ड नर्स रेखा भुषालले प्रथम स्थान हाँसिल गर्नुभएको थियो ।
लेवर रुमबाट सहभागि हुनुभएकी रजिष्टर्ड नर्स स्मृती रोकायाले द्वितिय स्थान हाँसिल गर्नुभएको थियो भने मेडिकल वार्डवाट सहभागिता जनाउनु भएकी रजिष्टर्ड नर्स पूजा अर्यालले तृतिय स्थान हाँसिल गर्नुभएको थियो ।
त्यसैगरी, विरामीको सेवामा अहोरात्र खट्ने नर्सहरुको कथाव्यथा सहितको विशेष नाटकको सुत्राधार इन्फेक्सन कन्ट्रोल विभागकी नर्सिङ इन्चार्ज इच्छा थापा मगर हुनुहुन्थ्यो । उहाँलाई अभिनयमा विभिन्न विभागका नर्सहरु तथा कर्मचारीहरु मञ्जु मेहता, रुस्मिता थापा, समिक्षा सुनार, कमला चौलागाँई, साभ्या सिंह,अप्सरा बस्नेत, सविता खनाल, सुमी गौतम, प्रिया दाहाल लगायतले साथ दिनुभएको थियो ।
नाटकमा नर्सहरुको मनोदशा र काम गर्दा समाना गर्नुपर्ने चुनौतीहरु, विरामी विरामीका आफन्त तथा नर्सको सम्वन्ध, प्रशासकको साथ सहयोग र उपचारपछिको खुशी लगायतका विषयमा यथार्थपरक जानकारी समेटिएको थियो ।
कार्यक्रम सघन उपचार कक्षमा कार्यरत रजिष्टार नर्सहरु एलियाना ढकाल र श्रद्धा अधिकारीले संचालन गर्नुभएको थियो ।
