लायन्स क्लब्स इन्टरनेसनल डिस्ट्रिक्ट ३२५ G (Lions Clubs International District 325 G) अन्तर्गत चिकित्सकहरूको विशेष र विशिष्ट क्लब “लायन्स क्लब अफ काठमाण्डौ रेडिएन्स डक्टर्स” को अध्यक्षमा बालरोग विशेषज्ञ डा. रेश्मा लामिछाने चयन हुनुभएको छ।
क्लबको ५औं वार्षिकोत्सव (5th Anniversary) को विशेष अवसरमा डा. लामिछानेले नयाँ कार्यकालका लागि नेतृत्व सम्हाल्नुभएको हो।
कार्यभार सम्हाल्दै नवनियुक्त अध्यक्ष डा. लामिछानेले चिकित्सकहरूको व्यस्त कार्यतालिकाका बाबजुद पनि लायन्सका स्थापित सबै पिलरहरू (Pillars) मा सक्रियतापूर्वक काम गर्नु र सामाजिक सेवामा निरन्तर जोडिनु नै यस क्लबको मुख्य विशेषता र सुन्दरता भएको बताउनुभयो।
“एक चिकित्सकका रूपमा हाम्रो दैनिकी निकै व्यस्त हुन्छ, तर समाजप्रतिको उत्तरदायित्वलाई भुलेका छैनौँ। व्यस्तताका बाबजुद समय व्यवस्थापन गरेर लायन्सका सेवामूलक क्षेत्रमा निरन्तर लागिरहनु र समाजलाई केही योगदान दिनु नै हाम्रो क्लबको पहिचान हो,” अध्यक्ष डा. लामिछानेले भन्नुभयो।
सेवा र नेतृत्व (Service & Leadership) का वार्षिक कार्यक्रम सार्वजनिक
आफ्नो कार्यकालका लागि सेवा (Service) र नेतृत्व विकास (Leadership) का विविध वार्षिक योजनाहरू तय गर्दै डा. लामिछानेले पदभार ग्रहण गरेकै दिनदेखि कार्यसमितिको सक्रिय उपस्थितिमा सेवामूलक कार्यहरूको सुरुवात गरिसक्नुभएको छ।
जसअन्तर्गत नयाँ कार्यसमितिको पहिलो कदमस्वरूप आजैका दिनदेखि सम्पदाहरूको सरसफाइ अभियान सुरु गरिएको छ। यस्तै, क्लबको तर्फबाट निःशुल्क स्वास्थ्य शिविर आयोजना गरिँदैछ, जहाँ सर्वसाधारणले विशेषज्ञ चिकित्सकहरूबाट प्रत्यक्ष स्वास्थ्य लाभ लिन सक्नेछन्।
आफ्नो ५ वर्षे यात्रा पूरा गरेको यस विशेष अवसरमा क्लबले आगामी दिनमा स्वास्थ्य क्षेत्रका अलावा पर्यावरण, भोकमरी निवारण, र बाल स्वास्थ्य जस्ता लायन्सका मुख्य प्राथमिकताहरूमा केन्द्रित रहेर थप प्रभावकारी कार्यक्रमहरू सञ्चालन गर्ने प्रतिबद्धता जनाएको छ। कार्यक्रममा डिस्ट्रिक्टका पदाधिकारीहरू र विभिन्न विधाका चिकित्सक लायन सदस्यहरूको बाक्लो उपस्थिति रहेको थियो।
