काठमाडौं, २२ चैत २०८१
स्वास्थ्य मन्त्रालयले ‘मर्निङ वाक’ तथा घर बाहिर ननिस्कन सर्वसाधारणलाई अनुरोध गरेको छ । वायु प्रदूषणका कारण काठमाडौंको वायु अस्वस्थकर बनेको भन्दै मन्त्रालयले सकेसम्म बाहिर ननिस्कन र बिहानी हिडाइ नगर्न अनुरोध गरेको हो ।
बुधबार प्रवक्ता डा. प्रकाश बुढाथोकीले विज्ञप्ति जारी गर्दै बाहिर निस्कनै परे मास्क अनिवार्य लगाउनुपर्ने बताएको छ।
वायु प्रदूषणबाट बच्नका लागि सकेसम्म अनावश्यक यात्रा र बिहानको समयमा हिडुल नगर्नका साथै बाहिर यात्रा गर्नै परेमा अनिवार्य रूपमा मास्क लगाउन र अत्यधिक प्रदूषित क्षेत्रहरूबाट टाढा रहन मन्त्रालय सबैमा अनुरोध गर्दछ’, विज्ञप्तिमा भनिएको छ ।
विश्वभरिको वायु प्रदूषणको अवस्था मापन गर्ने वर्ल्ड एक्यूआई र्याङ्किङका अनुसार नेपालको वायु विश्वकै अस्वस्थकर सूचीको अग्रस्थानमा छ ।
वर्ल्ड एक्यूआई र्याङ्किङ अनुसार ०–५० सम्म स्वस्थकर, ५१–१०० सम्म मध्यम जोखिम, १०१–१५० सम्म फोक्सोका विरामी, जेष्ठ नागरिक र बालबालिकाहरूका लागि हानिकारक र सबै समूहका लागि १५१–२०० सम्म अस्वस्थकर, २०१–३०० सम्म धेरै अस्वस्थकर र सो भन्दा माथि खतराजनक मानिने गरिन्छ।
विश्वका सबभन्दा बढी प्रदूषित देशको सातौँ स्थानमा रहेको नेपालको राजधानी काठमाडौंको हाल एक्यूआई ३०५ विन्दुमा रहेको छ ।
वायु प्रदूषणले मुटु, रक्तनली, फोक्सो, मस्तिष्क, आँखा, नाक, कान र घाँटी लगायतका अंगहरूमा गम्भीर असर पार्दछ । साथै, दम, क्यान्सर जस्ता नसर्ने तथा दीर्घ रोगहरूको जोखिम समेत बढाउँछ।
