जुम्ला, ०१ भाद्र २०८२
कर्णाली स्वास्थ्य विज्ञान प्रतिष्ठान जुम्लाले मृगौला रोगीका लागि डायलासिस सेवा औपचारिक रूपमा शुरु गरेको छ।
प्रतिष्ठानले यसअघि दुई पटक उद्घाटन भए पनि सेवा सुचारु गर्न नसकेकोले यसपटक सेवा सुरु गरेको छ।
प्रतिष्ठानका उपकुलपति डा. पुजन कुमार रोकायाका अनुसार हाल दुईवटा डायलासिस मेसिनमार्फत सेवा सुरु गरिएको छ। बिरामीको संख्या बढ्दै जाने अनुमान भएकाले थप चारवटा मेसिन तयारी अवस्थामा राखिएको उनले बताए।
प्रतिष्ठानका उपकुलपति डा. रोकायाका अनुसार खत्याड-२ मुगु जिरकला बियारलाई पहिलोपटक डायलासिस सेवा प्रदान गर्दै औपचारिक रूपमा सेवा सुचारु गरिएको हो। रोक प्रतिष्ठानले यो सेवालाई निरन्तर र व्यवस्थित रूपमा विस्तार गर्ने प्रतिबद्धता जनाए।
डा. रोकायाले भने, सेवा शुभारम्भलाई ऐतिहासिक उपलब्धि ठहर गर्दै कर्णालीका जनतालाई आफ्नै क्षेत्रमै उपचार दिने हाम्रो संकल्प आज साकार भएको छ। अब राजधानी धाउनुपर्ने बाध्यता हटेको छ, यसले बिरामीलाई मात्र होइन परिवारलाई पनि ठूलो राहत दिनेछ,” उनले भने। यस सेवाले कर्णालीमै स्वास्थ्य सेवा आत्मनिर्भर बनाउने दिशामा ठोस कदम चालिएको छ।
प्रतिष्ठानकि नर्सिङ निर्देशक सविना थापाले पनि यस सेवाबाट कर्णालीका बिरामीले ठूलो राहत पाउने विश्वास व्यक्त गरिन। अहिलेसम्म मृगौला रोगीलाई डायलासिस गर्न काठमाडौँ वा नेपालगञ्ज जस्ता ठूला सहर धाउनुपर्ने बाध्यता थियो। अब भने यहीँ सेवा सुरु भएपछि दुर्गमका बिरामीलाई उपचारमा सहज हुनेछ,” उनले भनिन्।
थापाले यसअघि २०७९ साल साउन १८ गते पहिलो पटक डायलासिस सेवा उद्घाटन गरिएको थियो। तर, आवश्यक तयारी नपुगेका कारण सेवा सञ्चालनमा ल्याउन सकिएन। सोही सेवालाई २०८० साल भाद्र १४ गते तत्कालीन स्वास्थ्य मन्त्री मोहन बहादुर बस्नेतबाट दोस्रो पटक उद्घाटन गरिए पनि नियमित सञ्चालन हुन सकेको थिएन। यो पटक भने प्रतिष्ठानले मुगु जिल्ला निवासी एक बिरामीलाई डायलासिस गरेर सेवा वास्तविक रूपमा सुरुवात गरेको छ।
जुम्लाका स्थानीय तहका प्रतिनिधिहरूले पनि यस सेवाबाट कर्णालीका गाउँघरमा बस्ने सर्वसाधारणलाई ठूलो मद्दत पुग्ने बताएका छन्। आर्थिक, भौगोलिक र समयजन्य कारणले उपचार पाउन कठिनाइ भोगिरहेका बिरामीलाई अब प्रतिष्ठानमै नियमित डायलासिस सुविधा उपलब्ध हुने भएको छ।
प्रतिष्ठानकी निमित्त निर्देशक डा. सुबि बस्न्यातले डायलासिस सेवा सुरु हुनु प्रतिष्ठानको दीगो प्रगतिप्रति ठूलो कदम भएको उल्लेख गरिन्। “यो सेवा कर्णालीका जनतामात्र होइन, सम्पूर्ण संस्थाका लागि गौरवको विषय भएको उनले बताइन् । अब हामी आत्मनिर्भर स्वास्थ्य सेवातर्फ अघि बढिरहेका छौं।
त्यस्तै, प्रतिष्ठानको मेडिसिन विभाग प्रमुख डा. राजेन्द्रमणी गिरीले पनि सेवाको सुरुवातलाई ऐतिहासिक उपलब्धि ठहर गर्दै उत्साह व्यक्त गर्नुभयो। अब हामीले बिरामीलाई निरन्तर डायलासिस सेवा दिन सक्नेछौं। कर्णालीमै उपचार सम्भव भएको देखेर हामी सबै चिकित्सकको मनोबल बढेको छ उनले बताए।
विशेषगरी मृगौलाका दीर्घकालीन रोगीहरूलाई नियमित डायलासिस आवश्यक पर्छ। तर कर्णाली क्षेत्रका बिरामीहरू आर्थिक, भौगोलिक र यातायातजन्य कठिनाइका कारण समयमा उपचार लिन सकिरहेका थिएनन्। यही आवश्यकतालाई दृष्टिगत गर्दै कर्णाली स्वास्थ्य विज्ञान प्रतिष्ठानले लामो समयदेखि तयारी गर्दै आएको यो सेवा सञ्चालनमा ल्याएको हो।
