दार्चुला १६ , बैशाख
भारतसंग सीमा जोडिएका सुदूरपश्चिम प्रदेशका विभिन्न जिल्लामा २ हजारभन्दा बढी नेपालीले क्वारेन्टाइन अवधि पूरा गरेर पनि नेपाल प्रवेश गर्न पाएका छैनन् ।सामान्यतयाः सरकारले १४ दिनसम्म क्वारेन्टाइन राख्दै आए पनि नेपालमा लकडाउन जारी रहेकाले सीमावर्ती क्षेत्रमा एक महिनादेखि नेपालीहरु अलपत्र परेका हुन् ।
सदूरपश्चिम प्रदेशका नौ जिल्लामध्ये कैलाली, कञ्चनपुर, डडेल्धुरा, बैतडी र दार्चुला भारतसँग सीमा जोडिएका छन् ।
ती जिल्लाका सीमा क्षेत्रमा २ हजार ३८ नेपालीहरु अहिले भारतले सीमावर्ती क्षेत्रमा बनाएको क्वारेन्टाइनमा बस्न बाध्य छन् ।
भारतको धार्चुलामा मात्रै विभिन्न चार स्थानमा आठ सय ३० जना नेपालीहरुलाई क्वारेन्टाइनमा राखिएको दार्चुलका सहायक प्रमुख जिल्ला अधिकारी टेकसिंह कुवँरले जानकारी दिए ।
उनीहरु सबैको स्वास्थ्य अवस्था सामान्य रहेको उनले जानकारी दिए । सीमामा रहेका नेपालीहरुलाई प्रवेश गर्न दिने नदिनेबारे केन्द्र सरकारसँग समन्वय गरि आवश्यक निर्णय लिइने उनले बताएका छन् ।
