सरकारी अस्पतालहरूमा आइतबार पनि सेवा सञ्चालन गर्ने सरकारको निर्णय र स्वास्थ्यकर्मीका समस्याका विषयमा ‘Team- REFORM for NMA’ ले स्वास्थ्य तथा जनसंख्या मन्त्रीसँग भेटवार्ता गरेको छ।
छलफलका मुख्य निष्कर्षहरू:
- बिदा र कार्यसमय: सरकारले इन्धन आपूर्तिको समस्या देखाउँदै आइतबार पनि अस्पताल खोल्ने आकस्मिक निर्णय गरेको भए पनि चिकित्सकहरूलाई ६ दिन नै काम लगाउँदा विभेद भएको कुरा टोलीले उठाएको थियो। जवाफमा मन्त्रीज्यूले आइतबारको साटो बुधबार वा अन्य दिन बिदा दिने विकल्पमा मन्त्रालय सकारात्मक रहेको बताउनुभयो।
- थप जनशक्ति र प्रोत्साहन: अतिरिक्त कामको लागि कार्यविधि तयार भइरहेको र थप जनशक्ति व्यवस्थापनका लागि अर्थ मन्त्रालयसँग O&M सर्वेबारे छलफल भइरहेको जानकारी मन्त्रालयले दिएको छ।
- प्रतिवेदन हस्तान्तरण: चिकित्सकका समस्याको दीर्घकालीन समाधानका लागि डा. भुषालको टोलीले ‘संघर्ष समितिको प्रतिवेदन’ मन्त्रीज्यूलाई हस्तान्तरण गरेको छ। मन्त्रीज्यूले उक्त प्रतिवेदन अध्ययन गरी कार्यान्वयनमा लैजाने प्रतिबद्धता जनाउनुभएको छ।
छलफलका क्रममा डा. भुषालले आफूहरू कुनै राजनीतिक दलको नभई स्वतन्त्र चिकित्सकहरूको समूह भएको स्पष्ट पार्दै सरकारका सकारात्मक कार्यमा सहयोग रहने तर सुधारका नाममा चिकित्सकहरूलाई अनावश्यक दुख दिएमा कडा संघर्षमा उत्रिन बाध्य हुने चेतावनी दिनुभएको छ।
