काठमाडौं, २७ मंसिर २०८१
स्वास्थ्यमन्त्री प्रदीप पौडेलले स्वास्थ्य सेवामा सर्वव्यापी हुनका लागि स्वास्थ्य बिमाको दायरा बढाउनुपर्ने बताएका छन् ।
आयोजित कार्यक्रममा बोल्दै मन्त्री पौडेलले स्वास्थ्यमा सर्वव्यापी पहुँच दिवसका अवसरमा यस्तो बताएका हुन् । ‘नागरिक योगदानमा आधारित बिमाले मात्रै स्वास्थ्यमा सर्वव्यापी पहुँच पुग्न सक्छ’,’जसले अस्पतालको चालु खर्च समेत बिमाबाट प्राप्त हुने स्थिती हुन्छ’, मन्त्री पौडेलले भने ।
मन्त्री पौडेलले बिमामा आधारित स्वास्थ्य प्रणाली हुनुपर्ने र त्यसका लागि आफुले पैरवी गरिरहेको समेत बताए । स्वास्थ्य सेवा जहिल्यै पनि गुणस्तरीय मात्रै हुने भएकोले यसमा गुणस्तरीयता जोड्न आवश्यक नभएको उनको तर्क थियो । सेवाका आधारमा अस्पतालको वर्गीकरण हुनुपर्ने धारणा मन्त्री पौडेलले थियो । ‘निरोधात्मक तथा उपचारात्मक सेवाको आधारमा अस्पतालको वगीकरण हुनपर्छ’, मन्त्री पौडेलले भने।
कार्यक्रममा बोल्दै स्वास्थ्य तथा जनसंख्या मन्त्रालयका सचिव डा. रोशन पोखरेलले सन् २०३० सम्म दिगो विकासको लक्ष्य प्राप्त गर्नका लागि स्वास्थ्यमा सर्वव्यापी हुनुपर्ने बताउनु भयो।
डा.पोखरेलले भने, ‘निरोधात्मक क्षेत्रमा काम गर्न सकेको ९० प्रतिशत काम गर्नुपर्ने अवस्था छ’, ‘जसले स्वास्थ्यमा आर्थिक भार समेत कम गराउँछ’। औषधि मुल्य समायोजन र स्वास्थ्य बिमामा सुधार गर्नुपर्ने अवस्था रहेको उनले बताए। स्वास्थ्यमा सर्वव्यापी पहुँचका लागि नयाँ स्रोत व्यवस्थाका लागि मन्त्रालय लागिपरेको डा. पोखरेलले जानकारी दिनुभयो।
स्वास्थ्य सेवा विभागका महानिर्देशक डा. विकास देवकोटाले स्वास्थ्य क्षेत्रमा प्रत्येक नयाँ कार्यक्रम ल्याउँदा त्यसको स्रोत व्यवस्थापन गरिनुपर्ने बताए। क्यान्सर, मुटु रोग जस्ता जटिल प्रकारका सेवालाई प्रदेशस्तरसम्म विस्तार गर्नुपर्ने उनको धारणा थियो ।
