धादिङ, २० पुष २०८१
धादिङको दक्षिण क्षेत्रमा रहेको चेपाङ समुदायमा भएको निःशुल्क स्वास्थ्य शिविरबाट ४ सय भन्दा बढी लाभान्वित भएका छन ।
धादिङको बेनिघाट रोराङ गाउँपालिका–२ ताल्तिमा लायन्स क्लव अफ काठमाडौं सुर्यमुखीले गरेको शिविरको आयोजनामा बेनिघाट रोराङ गाउँपालिकाको सह–आयोजनामा जनस्वास्थ्य कार्यालय धादिङको समन्वय र धादिङ अस्पतालको प्राविधिक सहयोग रहेको थियो
विशेषगरी सिमान्तकृत चेपाङ समुदाय लक्षित गरि स्वास्थ्य शिविर गरिएको लायन्स क्लव अफ काठमाडौं सुर्यमुखीका अध्यक्ष कृष्ण ढकालले बताउनुभयो । ‘ स्वास्थ्यको सहज पहुँच पगोस् भन्ने उद्देश्यका साथ शिविर गरेका हौं । निकै ठूलो संख्यामा चेकजाँच गर्न आउनुभयो । यस्तो विकट बस्तिमा आएर सेवा दिन पाउदा खुसी लागेको छ’ उहाँले भन्नुभयो– ‘शिविरमा जनरल मेडिसिन, जनरल सर्जरी, पेट तथा कलेजो रोग, हाड जोर्नी तथा नशा रोग, नाक, कान घाँटी रोग, प्रसुती रोग, छाला रोग, आँखा रोग, मुटु रोग, मुख तथा दाँत रोग, बाल रोगको सेवाहरु र मनोसामाजिक परामर्श सेवा दिएका छौं । यो उपस्थितिले हामीलाई थप हौसला थपेको छ ।’
लायन्स क्लव अफ काठमाडौं सुर्यमुखीले यस अघि पनि विभिन्न ठाउँमा यस्तै थुप्रै सामाजिक कार्य गर्दै आएको छ । आगामी दिनमा पनि शिक्षा, स्वास्थ्य, वातावरणको क्षेत्रमा काम गर्ने ढकालले बताउनुभयो ।
धादिङ अस्पतालका निमित्त अस्पताल निर्देशक डा. गगन अधिकारी नेतृत्वको विशेषज्ञ चिकित्सक टोलीले विरामीको स्वास्थ्य परीक्षण गरेको हो । शिविरले आम नागरिकमा स्वास्थ्य चेतना थपेको डाक्टर अधिकारी बताउनुहुन्छ। ‘ग्रामिण क्षेत्रमा रहेका नागरिकले ठूलै स्वास्थ्य समस्या परे मात्र स्वास्थ्य संस्था पुग्छन् । तर नियमित स्वास्थ्य परिक्षण गर्नु पर्छ भन्ने सन्देश यो शिविरले दिएको छ’ डा. अधिकारीले भने ‘धादिङ अस्पतालले विभिन्न शिविरमा सहभागी भएर सेवासँगै जनचेतनामूलक कार्यक्रम गर्दै आएको छ । अन्जानमा रोग पालेर बसेका नागरिकका रोग पहिचान भएका छन् । उहाँहरुले थप स्वास्थ्य उपचार गर्नु हुनेछ र नियमित स्वास्थ्य परिक्षण गराउने बानीको विकास हुने अपेक्षा गरेका छौं ।’
लायन्स इन्टरनेशनल डिस्टिक ३२५ का गभर्नर विनोद ढुंगानाले नयाँ काम गरौँ र समाजलाई सहयोग गरौँ भन्ने भावनासहित शिविर सञ्चालन गरिएको बताउनुभयो । ढुंगानाले स्थानीय विपन्न समुदायको स्वास्थ्य सचेतना र स्वास्थ्य सेवामा पहुँच वृद्धि गर्न शिविरले महत्वपूर्ण भूमिका खेल्ने हुदा यस्ता कार्यक्रमहरूले समाजमा सकारात्मक प्रभाव पार्ने विश्वास रहेको डा. अधिकारीको भनाई छ ।
बेनिघाट रोराङ गाउँपालिकाका अध्यक्ष कृष्ण बहादुर थपलियाले नागरिकको आधारभूत आवश्यकता प्रवाहमा विशेष जोड दिएको बताउनुभयो । ‘आजको शिविरले पनि हामीलाई थप सहयोग पुगेको छ । सहयोगी संघरसंस्थाहरुले गर्दै आएको यस्ता कामले थप सहयोग पुगेको छ ।’ थपलियाले भने– ‘श्रोत साधनको कमिका कारण नागरिकलाई चाहे अनुसार सेवा प्रवाह गर्न सकिएको छैन । तर हामी शिक्षा, स्वास्थ्य लगायतका क्षेत्रमा विशेष योजना बनाएर अघि बढी रहेका छौं’।
धािदङ अस्पतालका विशेषज्ञ चिकित्सक सहित २७ जनाको प्राविधिक टोलि शिविरमा सेवा दिन पुगेका थिए । शिविरमा चार सय १५ जना सेवाग्राहीले सेवा लिएको धादिङ अस्पतालका जनरल फिजिसियन डा. दिनेश रेग्मीले जानकारी दिनुभयो।
