नयाँ बर्षको स्वागत गर्ने नयाँ शैली : रक्तदान

काठमाडौँमा रक्तदान गरी यूवाहरुले नयाँ बर्ष मनाएका छन् । बैशाख एक गते शुक्रबार रेडक्रस केन्द्रीय रक्तसञ्चार सेवाको प्राविधिक सहयोगमा काठमाडौँमा १४० जनाले रक्तदान गरेका हुन् । उत्सव मनाउने एउटा अव्वल तरीका रक्तदान  हो भन्ने धारणा बढ्दै गएकोमा केन्द्रीय रक्तसञ्चार सेवाका निर्देशक दिव्यराज पौडेलले खुशी व्यक्त गर्नुभयो ।

राष्ट्रिय प्रजातन्त्र पार्टीका नेता राजेन्द्र लिंगदेनले थापागाउँ बानेश्वरमा युवा संगठनको आयोजनामा भएको रक्तदानमा आज बैशाख १ गते विहान ८ बजे पहिलो रक्तदान गर्नुभएको थियो । यूवाहरुले नियमित रक्तदान गरुन् र नयाँ यूवाहरुपनि यसमा आकर्षित होऊन भन्ने मेरो अभिलाशा रहेकोले आफूले ८४ पटकको रक्तदान गरेको उहाँले बताउनुभयो ।

रिडिङ रुम फाउण्डेसनले मध्य बानेश्वरमा, श्वेता रक्तदान अभियानले बसन्तपुरमा र शान्तिज्ञान सत्संग भजन मण्डलले डिल्लीबजारमा पनि युवा लक्षित रक्तदान कार्यक्रम आयोजना गरेका थिए । टोखाको चण्डेश्वरी मन्दिरमा नयाँबर्ष मनाउन गएका ३५ बर्षिय ज्ञानेश पौडेलले त्यही नजीकै आयोजित शिविरमा रक्तदान गर्नुभयो । दान गरी नयाँ वर्ष सुरु गर्न राम्रो हुने सम्झेर रक्तदान जस्तो महादान गरेको ज्ञानेशको भनाई थियो ।

आज र भोली नयाँ वर्षको उपलक्ष्यमा उपत्यका र उपत्यका बाहिर रक्तदानका कार्यक्रम आयोजना भइरहेका रेडक्रसका प्रादेशिक र जिल्ला रक्तसञ्चार सेवाहरुले बताएका छन् । तर ती सहज रगत आपूर्तिमा अझै अपर्याप्त रहेका छन् । तराईमा अहिले चैत्र, बैशाखमा राम्रैसँग संकलन सेडुल भएपनि गर्मी बढेसँगै रक्तदानमा कमी हुनसक्ने  चितवन, विराटनगर, धनगढी र नेपालगञ्जका रेडक्रस रक्तसञ्चार इन्चार्जहरुले चिन्ता व्यक्त गरेका छन् । लहान, सिरहामा रक्तदान बढाउन  सञ्चार माध्यमबाट यूवा लक्षित प्रचारात्मक र अनुरोधात्मक अभियान सुरु गरिसकेको इन्चार्ज मनिष यादवले जानकारी दिनुभएको छ ।
धादिङमा रक्त अभियान सञ्चालन गरिरहेका नारायण श्रेष्ठले विरामीलाई भेट्न जाँदा एक किलो स्याऊ लिएर मुख देखाउन जानभन्दा आवश्यक परे रक्तदान गर्न तयार भएर यूवाहरु जानुपर्ने र त्यसले रगतको अभाव परिपूर्ति गर्न मद्यत पुग्ने बताउनुभयो ।