कंचनपुर, २६ पौष २०७७
सुदूरपश्चिम प्रदेश सामाजिक बिकास मन्त्रालय , स्वास्थ्य निर्देशनालय राजापुर डोटीको आयोजना र लालझाडी गाउँपलिका कन्चनपुरको समन्वय र सहकार्यमा कुष्ठरोगीहरुको सक्रिय खोजपडताल कार्यक्रम पौष २६ , २०७७ बाट शुरु गरेको छ ।
संघिय सरकार बाट प्राप्त कार्यक्रम र मार्गदर्शन अनुसार कुष्ठरोग बढी प्रभावित स्थानमा महिला स्वास्थ्य स्वयम् सेविका र बिशेष किसिमको तालिम प्राप्त चिकित्सक तथा स्वास्थ्यकर्मी परिचालन गरेर समुदायमा बसोबास गर्ने मानिसहरुको घर घर सम्म पुगी कुष्ठरोग खोजपडतालको काम गरिने स्वास्थ्य निर्देशनालय राजपुर्डोटीमा कार्यरत क्षय कुष्ठ निरीक्षक श्री मनोज प्रसाद ओझाले बताउनु भएको छ । नेपालबाट १९ जनवरी सन् २०१० मा कुष्ठरोग निवारणको घोषणा गरि सकेको भए पनि सुदूरपश्चिम प्रदेशको कैलाली , कंचनपुर र अछाम जिल्ला अहिले सम्म पनि जिल्ला स्तरमा निवारणको लक्ष्य भेटाउन नसकेका जिल्ला हरु हुन् , त्यस कारण उक्त तिन जिल्लामा अहिले पनि समुदायमा कुष्ठरोगीहरु उपचारको पहुँचमा आउन नसकेका हुन् सक्छन ।
उपचारको पहुँचमा आउन नसकेका सम्भावित कुष्ठरोगिहरु सक्रिय रुपमा खोज्ने र त्यस्ता सम्भावित व्यक्तिहरुलाई स्वास्थ्य संस्था सम्म प्रेषण गरि स्वास्थ्य संस्थामा बिज्ञ चिकित्सक तथा स्वास्थ्यकर्मीहरुले उक्त संकाश्पद व्यक्तिमा कुष्ठरोग हो कि होइन भन्ने कुरा निर्क्यौल गर्ने गरि कन्चनपुरको लालझाडी गाउपालिकामा कार्यक्रम आयोजना गरिएको हो ।
कुष्ठरोग सक्रिय खोजपडताल कार्यक्रमको उद्घाटन सत्रमा स्वास्थ्य निर्देशनालय राजपुर् डोटीका स्वास्थ्य निर्देशक डा. गुणराज अवस्थी ज्युले कुष्ठरोगको सराइ अवधि लामो हुने र तत्काल कुनै गम्भीर खालको समस्या पनि नदेखिने हुनाले मानिसहरु आफु लाई समयमै कुष्ठरोग लागेको कुरा थाहा पाउन सक्दैनन् । लामो समय पछी रोग पत्ता लाग्ने र त्यतिन्जेल सम्म त्यस्ता व्यक्तिहरुमा केहि न केहि अपाङ्गता पनि देखा पर्ने हुन् सक्छ । त्यहि अपाङ्गता दर घटाउन , समयमै उपचारको सम्पर्कमा ल्याएर रोगीको निको हुने दर बढाउन तथा अन्य व्यक्तिहरुलाई रोग सर्न बाट बच्नको लागि कुष्ठरोगको सक्रिय खोजपडताल कार्यक्रम आयोजना गरिएको बताउनु भएको छ । उहाँले लालझाडी भन्दा पहिला कैलालीको गौरिगंगा नगरपालिकामा सक्रिय खोजपडतालको कार्यक्रम सम्पन्न भै सकेको र उक्त नगरपालिकामा सक्रिय खोजपडतालका माध्यम बाट १० जना शंकास्पद व्यक्तिहरुको पहिचान भएको, त्यसरी शंकाश्पद मानिएका व्यक्तिहरुको थप जांच भैरहेको समेत कुरा बताउनु भएको छ त्यस कारण कुष्ठरोगको सक्रिय खोजपड्ताल कार्यक्रम महत्वपुर्ण कार्यक्रम भएको कार्यक्रममा उपस्थित सबैले आ- आफ्नो तह तप्का बाट सहयोग गर्नु पर्ने र समयमै यस रोगलाई सुदूरपश्चिम प्रदेश बाट निर्मुल गर्ने अभियान मा सक्रिय सहभागिता रहनु पर्ने कुरामा समेत बल दिनु भएको छ ।
कुष्ठरोग सक्रिय खोजपडताल कार्यक्रम लालझाडी गाउपालिका का अध्यक्ष श्री मदनसेन बडायकको अध्यक्षतामा सम्पन्न भएको थियो । उक्त कार्यक्रममा गाउपालिका उपाध्यक्ष सत्या देवी महरा , स्वास्थ्य कर्मीहरु , महिला सामुदायिक स्वास्थ्य स्वयम् सेविकाहरु , बुद्धीजीवि , संचारकर्मी लगायतको उपस्थिति रहेको थियो ।
