काठमाडौं, २९ भाद्र २०७९
महामारीका रुपमा डेंगु भाइरस फैलिएसँगै काठमाडौंका अस्पतालहरुमा बिरामीको संख्या बढेको छ। महामारीको समय मध्यम तथा न्यून आय भएका मानिसलाई सहयोग पुर्याउने लक्ष्यसहित नयाँ बानेश्वरस्थित एभरेस्ट अस्पतालले जनरल वार्ड सञ्चालनमा ल्याएको छ।
यस वार्डमा विशेषज्ञ डाक्टरसहितका स्वास्थ्यकर्मी चौबिसै घण्टा बिरामीको सेवामा खटिएका छन्। ‘सर्वसाधारणलाई उपचारमा आर्थिक समस्या नहोस् भनेर हामीले जनरल वार्ड सञ्चालनमा ल्याएका हौं,’ अस्पतालका निर्देशक तथा प्रशासकीय प्रमुख दीपक बरालले भने,‘ दैनिक अत्यन्तै कम मूल्य तिरेर बिरामी यहाँ भर्ना हुन सक्छन्। आर्थिक अवस्था कमजोर भएकालाई उपचारमा थप सहुलियत तथा अति विपन्नलाई नि:शुल्क उपचार पनि गर्छौं। उपचार नपाएर कोही मर्नु हुँदैन भन्ने हाम्रो मान्यता हो।’
एभरेस्ट अस्पतालमा बरिष्ठ चिकित्सक डा. निरज नेपाल, डा. निमेश पौडेल, डा. सरोज गौडेल, डा. प्रताप नारायण शाह लगायत स्वास्थ्यकर्मी सम्मिलित मेडिकल टिमले डेंगुको उपचार गरिरहेको छ।
२०१९ यताकै उच्च बिन्दुमा महामारी
पछिल्लो विवरणअनुसार डेंगुबाट यस वर्ष देशभर ९ हजारभन्दा धेरैजना संक्रमित भइसकेका छन्, जो सन् २०१९ पछिको उच्च महामारी हो। त्यसबेला १७ हजारभन्दा धेरैजनामा संक्रमण देखिएको थियो। त्यसैगरी २०१६ मा १५ सय ११ र ०१७ मा २१ सय ११ जनामा डेंगु देखिएको थियो।
२०१९ मा महामारी फैलदाँ सुनसरी, चितवन, कास्की र काठमाडौं मुख्यगरी प्रभावित भएका थिए। अहिले आएर ललितपुर र काठमाडौंमा सबैभन्दा ठूलो असर देखिएको छ। स्वास्थ्य मन्त्रालयले सोमबार सार्वजनिक गरेको आँकडाअनुसार ललितपुरमा तीन हजार ६ सय २२ र काठमाडौंमा दुई हजार चार सय १४ जनामा डेंगु संक्रमण देखिएको छ।
एभरेस्ट अस्पतालमा परीक्षणका लागि आएकामध्ये ६० प्रतिशतभन्दा धेरैमा संक्रमण पुष्टि भएको निर्देशक बरालले बताए। ‘हाम्रोमा यस महिना ९ भदौ० १ गतेदेखि अहिलेसम्म १ हजार ६० जना डेंगु परीक्षणका लागि आएकोमा ८ सय २३ जनामा संक्रमण देखिएको छ,’ बरालले भने,‘ डेंगु प्रकोपकै रुपमा देखिएकाले सर्वसाधारणलाई धेरैभन्दा धेरै सुविधा कसरी प्रदान गर्न सकिन्छ भन्नेमा हाम्रो ध्यान केन्द्रीत छ।’
यसअघि कोभिडको समयमा पनि अस्पतालले बिरामीहरुलाई यसरी नै सर्वसुलभ सेवा उपलब्ध गराएको थियो। ‘ देशमा भैपरी आएका बेला तथा महामारीका रुपमा स्वास्थ्य समस्या आएका बेला हामी यसरी नै सक्रिय हुन्छौं,’ निर्देशक बरालले भने, ‘कोभिडको समय हामीले सर्वसाधारणलाई सेवा पुर्याउनका लागि ओपिडी कक्षलाई समेत जनरल वार्डमा बदलेका थियौं। हामी प्रकोप आएका बेला नेपाल सरकारलाई सहयोग गर्छौ र सबै बिरामीले स्वास्थ्य उपचार पाउनुपर्छ भन्ने हो।’
सरकारले डेंगुको परीक्षण निशुल्क गर्नसके धेरैभन्दा धेरै बिरामी उपचारको दायरामा आउने र महामारी नियन्त्रणमा सहयोग पुग्ने उनले बताए। ‘डेंगुजस्ता महामारीमा परीक्षण निशुल्क गर्नुपर्छ। अर्को, वडास्तरमा लामखुट्टेको लार्भा खोज्ने र नस्ट गर्ने अभियान प्रभावकारी रुपमा सञ्चालन गर्नुपर्छ। त्यस्तै गरिब परिवारलाई उपचारमा सधैं सहयोग गर्नुपर्छ।’
