काठमाडौं, १३ असार २०७९
थापाथलीस्थित नर्भिक अस्पतालका वरिष्ठ पेट रोग विशेषज्ञ डा. सन्दीप राज कुँवरले बिना शल्यक्रिया आमाशयमा अड्किएको चम्चा निकालेका छन्।
नर्भिक अस्पतालमा डा. कुँवर नेतृत्वको टिमले बिना शल्यक्रिया इण्डोस्कोपी गरी आमाशयमा गएर अड्किएको चम्चा निकालेको हो।
काठमाडौंकै एक १७ वर्षिया किशोरीले झुक्किएर निलेको चम्चालाई बिना शल्यक्रिया र सफलतापुर्वक निकालिएको हो।
डा. कुँवरले चम्चा नै निलेर आमाशयमा अड्किनु जटिल घटना भएको बताए। यस्तो घटनामा अड्किएको चम्चालाई निकाल्न शल्यक्रिया नै गर्नुपर्ने अवस्था भए पनि निकै सुरक्षित तरिकाले इण्डोस्कोपी गरी बिना शल्यक्रिया निकालेको डा. कुवँरले बताउनुभयो।
नेपालमा सम्भवत बिना शल्यक्रिया चम्चा नै आमाशयबाट सुरक्षित ढंगले निकालेको यो नै पहिलो घटना भएको डा. कुवँरले बताए।
डा. कुवँरका अनुसार यस्तो बिरामीहरुलाई वाकवाक गरिरहन पर्ने र वाकवाकी गराउनका लागि चम्चा घाँटीतिर हाल्दा झुक्किएर निलेको देखिन्छ। आमाशयमा गएर अड्किएकोले आन्द्रातिर जान नपाएको अवस्थामा हामीले सुरक्षित ढंगले चम्चा निकालेका हौं।
आमाशयमा अड्किएको चम्चा ४५ मिनेटको प्रयासमा बिना शल्यक्रिया निकालिएको र चम्चा निकाल्ने क्रममा कतै पनि कुनै चोट वा घाउ समेत लागेन । यो हाम्रा लागि नयाँ सफलता र नयाँ अनुभव दिने घटना भएको डा. कुँवरले जानकारी दिनुभयो।
आइतबार चम्चा निलेर आएकी बिरामीलाई रातभर अब्जरभेसनमा राखेर सबै अवस्था नर्मल देखिएपछि सोमबार बिहान डिस्चार्ज गरिसकिएको छ।
