स्वास्थ्य तथा जनसंख्या मन्त्री निशा मेहताको प्रमुख विज्ञ सल्लाहकारमा प्रा.डा. मनोहर प्रधानले जिम्मेवारी दिने निर्णय गरेका छन्।
राष्ट्रिय स्वतन्त्र पार्टीले डा. प्रधानलाई मन्त्रीको विज्ञ सल्लाहकारका रूपमा पठाउने आधिकारिक निर्णय गरेसँगै सरकारले डा. प्रधानलाई सो जिम्मेवारी दिने निर्णय गरेको हो।
चिकित्सा क्षेत्रमा लामो अनुभव सँगालेका डा. प्रधानलाई मन्त्रालयको अवैतनिक विज्ञ सल्लाहकारको रूपमा नियुक्तिको पत्र दिन लागिएको छ।
चितवनलाई कार्यथलो बनाएर लामो समयदेखि चिकित्सा पेशा र प्राध्यापनमा लागिपरेका डा. प्रधान विगत १८ वर्षदेखि कलेज अफ मेडिकल साइन्सेज भरतपुरमा प्राध्यापनरत छन्।
डा. प्रधान पेशागत मर्यादा र दक्षताका कारण दुई पटक नेपाल मेडिकल काउन्सिलको निर्वाचित सदस्य समेत भइसकेका छन्।
यसका साथै डा. प्रधानले नेपाल चिकित्सक संघ, चितवन शाखाको उपाध्यक्षको जिम्मेवारी समेत सम्हालिसकेका छन्।
रास्वपाको स्थापनाकालदेखि नै सक्रिय डा. प्रधानले पछिल्लो समय पार्टीको बागमती प्रदेश स्वास्थ्य तथा जनसंख्या विभागको संयोजकका रूपमा काम गर्दै आएका थिए। उनले नेपालको स्वास्थ्य क्षेत्र सुधारका लागि निरन्तर लागरहेन प्रतिबद्धता जनाएका थिए।
चिकित्सा क्षेत्रका प्राविधिक, नीतिगत र प्रशासनिक पक्षमा गहिरो दख्खल राख्ने उनको नियुक्तिले मन्त्रालयको कार्यसम्पादन र स्वास्थ्य नीति निर्माणमा महत्त्वपूर्ण योगदान पुग्ने अपेक्षा गरिएको मन्त्रालयको एक कर्मचारीले जानकारी दिनुभयो।
