काठमाडौं, २४ फागुन २०८१
वरिष्ठ मुटुरोग विशेषज्ञ डा. अनिल भट्टराईको नेतृत्वमा नेपालमै पहिलोपटक Minimally invasive direct coronary artery bypass grafting (MIDCABG) प्रविधिबाट मुटुको सफल शल्यक्रिया सम्पन्न भएको छ ।
तनहुँको म्याग्दी गाउँपालिका १ घर भएका ४५ वर्षीय पुरुषको महाराजगञ्जस्थित् मनमोहन कार्डियोथोरासिक भास्कुलर एण्ड ट्रान्स्प्लान्ट सेन्टरमा (MIDCABG) प्रविधिबाट मुटुको सफल शल्यक्रिया सम्पन्न भएको हो ।
बिरामीको चार वर्षअघि साउदी अरबमा ७० प्रतिशत भन्दा बढी मुटुको नशा बन्द भएको पत्ता लागेको थियो । साउदीमै मुटुको नशा खोल्न स्टेन्टिङ गरिएको थियो । तर, उक्त नशा पूनः बन्द भएपछि उनी उपचारको लागि नेपालमा फर्किएका थिए। उनको गत बिहीबार उच्चतम प्रविधिबाट उक्त शल्यक्रिया गरिएको हो ।
मनमोहन सेन्टरका सिटिभिएस विभागीय प्रमुख एवम् वरिष्ठ मुटु शल्य चिकित्सक डा. अनिल भट्टराईको नेतृत्वमा उक्त शल्यक्रिया सम्पन्न भएको हो । अहिले ती विरामीको अवस्था राम्रो रहेको र उनलाई आईसियूबाट अहिले नर्मल वार्डमा सारिएको डा. भट्टराईले बताउनु भयो । एक/दुई दिनको अस्पताल बसाईपनि बिरामीको डिस्चार्ज गरिने डा. भट्टराईले जानकारी दिनुभयो।
