काठमाडौं, ९ जेठ २०७९
सुर्खेतको लेकवेशी नगरपालिकाले पाँच जना विद्यार्थीलाई निःशुल्क डाक्टर पढाउने भएको छ। नगरपालिका प्रमुखको कार्यभार सम्हाल्दै नेपाली कांग्रेसका नगर प्रमुख उमेश पौडेलले आफ्नो कार्यकाल अवधि पाँच वर्षमा पाँच जना डाक्टर पढाउने निर्णय गरेका हुन्। लेकवेशी नगरपालिकाले प्रत्येक वर्ष एक जनालाई निशुल्क डाक्टर पढाउने छ।
पौडेलले भने, हामीले शिक्षा र स्वास्थ्यलाई विशेष प्राथामिकता दिने, पहिलो वर्ष एक जनालाई डाक्टर पढ्दा लाग्ने खर्च नगरपालिकाले व्येहोर्ने योजना बनाएका छौँ।
नगरपालिकामा प्राथमिक स्वास्थ्य चौकी भएपनि विशेषज्ञ डाक्टरहरु नहुँदा स्थानीयले उपचार नपाएको भन्दै पाँच वर्षको अवधिमा अछात्रवृतिमार्फत डाक्टर पढाउने निर्णय नगरपालिकाले गरेको हो।
त्यस्तैगरी नगरपालिकाले गर्भवती तथा सुत्केरीहरुलाई निःशुल्क एम्बुलेन्स सेवा पनि उपलब्ध गराउने निर्णय पनि गरेको छ। लेकवेशीका गर्भवती तथा सुत्केरीहरुलाई प्रदेश अस्पताल सुर्खेत तथा अन्य अस्पतालहरुमा लैजान निशुल्क एम्बुलेन्स सेवा उपलब्ध गराउने नगर प्रमुख पौडेलले बताए।
नगरपालिका भित्रका स्वास्थ्य संस्थाबाट प्रदान हुने सेवा अपर्याप्त भएमा उच्च तहको सेवाका लागि लिनु परेमा एम्बुलेन्स सेवा निःशुल्क उपलब्ध गराइने नगर प्रमुख पौडेलले बताउनु भयो।
